Nga: Dashnim HEBIBI
Zürich, 07 korrik – Edhe këtë verë, mërgata shqiptare po dëshmon se dashuria për atdheun nuk shuhet me vite, por rritet me kohën. Pavarësisht mundësive për destinacione ekzotike, shumica e bashkatdhetarëve në Zvicër e kanë të qartë: pushimet më të mira kalohen në Kosovë, Maqedoni, Luginë apo Mal të Zi. Gjenerata e parë dhe e dytë nuk i ndërrojnë rrugët drejt vendlindjes me asnjë plazh të botës.
Fundjava e 4 dhe 5 korrikut solli gjallëri nëpër qendrat tregtare të Kantonit të Cyrihut, ku vërehej një lëvizje e madhe e bashkatdhetarëve. Me afrimin e pushimeve verore dhe mbylljen e shkollave më 14 korrik, shumë familje po përgatiten për udhëtimin e gjatë drejt vendlindjes.
Gjatë vizitës sonë në disa nga qendrat më të njohura tregtare, takuam shumë mërgimtarë që nguteshin për të përfunduar blerjet, kryesisht dhurata për familjarët dhe miqtë në Kosovë, Maqedoni, Luginë e Preshevës dhe Mal të Zi. Si çdo vit, mërgimtari shqiptar nuk shkon duarthatë në atdhe – kjo është bërë tashmë traditë.
Disa prej tyre blinin edhe për vete, për t’u përgatitur për pushimet që i kanë ëndërruar gjatë gjithë vitit. Në një sondazh të shpejtë me 14 persona, 11 prej tyre u përgjigjën se do t’i kalojnë pushimet në atdhe, ndërsa tre do të udhëtojnë drejt Shqipërisë për të shijuar detin.
Shtatë nga bashkëbiseduesit kishin vizituar destinacione si Turqia dhe Egjipti gjatë muajit tetor, ndërsa katër të tjerë nuk do të udhëtojnë këtë verë për shkak të obligimeve familjare. Megjithatë, edhe për ta, vizita në vendlindje mbetet gjithmonë prioritet.
Në fokus të javëve të ardhshme:
A po zbehet ndjesia e lidhjes me atdheun te gjenerata e tretë e mërgatës?
Kjo mbetet një temë që do të trajtojmë në ditët në vijim, duke bashkëbiseduar me të rinj shqiptarë të lindur e rritur në Zvicër, për të kuptuar se sa vend zë Kosova dhe Shqipëria në planet e tyre verore dhe në identitetin e tyre kulturor. ( Foto ilustrim )
SAM24.info