Presidentja e Republikës , Vjosa Osmani ka pritur sot në takim Komandantin e Gardës Kombëtare të shtetit amerikan të Iowas, Gjeneralmajor, Stephen Osborn.
Siç ka bërë të ditur presidenca, bashkë të dy diskutuan për bashkëpunimin e ngushtë ndërmjet FSK-së dhe Gardës Kombëtare të Iowas, si dhe për planet e ardhshme të thellimit të këtij partneriteti strategjik.
“Aleanca me SHBA-të në fushën e mbrojtjes, e fuqizon shtetin dhe sovranitetin e Republikës së Kosovës”, ka cituar komunikata fjalët e presidentes Osmani.
Më tej, bëhet e ditur se e para e shtetit i ka shprehur mirënjohje dhe vlerësim të lartë për mbështetjen e vazhdueshme që Garda e Iowas i ka dhënë FSK-së në zhvillimin dhe avancimin e kapaciteteve operacionale, të cilat, siç thuhet, u demonstruan me sukses gjatë ushtrimit të përbashkët ndërkombëtar “Defender Europe 2025”.
“Ajo veçoi faktin se këtë vit, në kuadër të këtij ushtrimi, Kosova pati nderin të mirëpresë Komandën Taktike të Divizionit të 28-të të Këmbësorisë së Ushtrisë Amerikane, dhe se pjesëtarë të Gardës Kombëtare të Ioëas ishin pjesë aktive e forcës së përbashkët që veproi në territorin e Kosovës”, thuhet në njoftimin për këtë takim.
Gjithashtu, kanë treguar se presidentja, që është komandante supreme e Forcës së Sigurisë së Kosovës, i ka shprehur falënderim dhe vlerësim për mundësinë që iu dha një kontingjenti të FSK-së për të kryer stërvitje të përbashkëta në Qendrën e Trajnimit për Gatishmëri të Përbashkët në Louisiana, së bashku me pjesëtarët e Gardës së Iowas dhe forcave tjera aleate amerikane, njofton rtk.