Ceremoni solemne para Kuvendit, Haxhiu ia dorëzon Kushtetutën presidentes së re
Prishtinë – Justina Shiroka-Pula ka marrë zyrtarisht detyrën e presidentes së Republikës së Kosovës, në një ceremoni solemne të zhvilluar para objektit të Kuvendit të Kosovës. Në ceremoninë e inaugurimit, ushtruesja e deritanishme e detyrës së presidentes, Albulena Haxhiu, ia ka dorëzuar Shiroka-Pulës Kushtetutën e Republikës së Kosovës, duke shënuar zyrtarisht kalimin e detyrës tek presidentja e re. Shiroka-Pula është pritur në hyrje të oborrit të Kuvendit nga Haxhiu, ndërsa në ceremoninë solemne kanë marrë pjesë kryeministri Albin Kurti, komandanti i Forcës së Sigurisë së Kosovës, Bashkim Jashari, si dhe përfaqësues të institucioneve dhe partive politike. Ceremonia ka nisur me ekzekutimin e himnit të Republikës së Kosovës nga Togu Ceremonial i Forcës së Sigurisë së Kosovës.
Zgjedhja me 81 vota
Shiroka-Pula u zgjodh presidente e Kosovës në seancën e jashtëzakonshme të Kuvendit, e mbajtur të martën mbrëma dhe e përfunduar në orët e para të së mërkurës. Ajo mori 81 vota në rundin e parë të votimit, duke siguruar zgjedhjen në përputhje me afatin kushtetues për zgjedhjen e presidentit të vendit. Kandidatura e saj u propozua nga kryeministri Albin Kurti, ndërsa për zgjedhjen e saj pati mbështetje edhe nga deputetë të Partisë Demokratike të Kosovës. Me marrjen zyrtare të detyrës, Justina Shiroka-Pula nis mandatin e saj në krye të Presidencës së Republikës së Kosovës. Ceremonia e sotme shënon një kapitull të ri institucional për vendin, me presidenten e re që tashmë ushtron zyrtarisht përgjegjësitë e saj kushtetuese në krye të shtetit.
