Pas konsultimeve me shefat e grupeve parlamentare, kryetarja e Kuvendit, Albulena Haxhiu, bëri të ditur se seanca për buxhetin është shtyrë për të hënën, duke nisur nga ora 10:00. Procesi i votimit të buxhetit për vitin 2026 në lexim të parë u përball me kundërshtime nga partitë opozitare, të cilat kërkuan më shumë kohë për shqyrtimin e dokumentit prej rreth 700 faqesh. Deputetët opozitarë theksuan se kanë nevojë ta lexojnë materialin për të qenë në gjendje të paraqesin propozime konkrete.
Lidhja Demokratike e Kosovës dhe Partia Demokratike e Kosovës kanë kundërshtuar shmangien e procedurave, duke kërkuar më shumë kohë për analizimin e dokumentit financiar. Kryetari i LDK-së, Lumir Abdixhiku, dhe shefi i Grupit Parlamentar të PDK-së, Arian Tahiri, kanë theksuar nevojën për trajtim më serioz të buxhetit.
Pas këtyre qëndrimeve, Haxhiu thirri në takim shefat e grupeve parlamentare dhe mori vendim që seanca të shtyhet./BS
