Misioni Artemis II u nis mbrëmjen e djeshme (1 prill) nga Qendra Hapësinore Kennedy në Florida, duke shënuar një moment të rëndësishëm për rikthimin e njerëzimit në eksplorimin e thellë të hapësirës. Katër astronautë janë në një mision 10-ditor që do t’i çojë ata në një fluturim rreth Hënës, në një provë kyçe për misionet e ardhshme.
Ekuipazhi përbëhet nga astronautët e NASA-s Reid Wiseman, Victor Glover dhe Christina Koch, si dhe Jeremy Hansen nga Agjencia Hapësinore Kanadeze. Për Hansen, një pilot luftarak i rritur në Ontario, ky është udhëtimi i tij i parë në hapësirë.
Pas nisjes, raketa Space Launch System (SLS) përfundoi me sukses fazën fillestare, ndërsa kapsula Orion u nda dhe nisi një testim manual 70-minutësh për të verifikuar funksionimin e sistemeve gjatë fluturimit.
Rëndësia e këtij misioni është e jashtëzakonshme, pasi për herë të parë pas më shumë se 50 vitesh, astronautët po rikthehen në afërsi të Hënës. Artemis II pritet gjithashtu të vendosë një rekord të ri, duke udhëtuar më larg nga Toka se çdo mision i mëparshëm me ekuipazh, duke tejkaluar edhe kufijtë e arritur nga programi Apollo.
Kryeministri kanadez Mark Carney e cilësoi këtë moment si historik për vendin e tij, duke theksuar se Kanadaja bëhet vetëm kombi i dytë që dërgon një astronaut në një mision hënor. Ai vlerësoi veçanërisht Jeremy Hansen, duke e quajtur suksesin e tij rezultat të viteve të përkushtimit, disiplinës dhe profesionalizmit.
“Ky moment dëshmon se Kanadaja është një komb eksploruesish, ndërtuesish dhe inovatorësh”, deklaroi Carney.
Ai shtoi gjithashtu se ka zhvilluar një bisedë me Presidentin e SHBA-së, Donald Trump, për rëndësinë e misionit dhe bashkëpunimin ndërkombëtar në eksplorimin e hapësirës, transmeton rtsh.
