Kryeministri i Shqipërisë, Edi Rama, ka bërë të ditur se javën e ardhshme do të krijohet Ministria e Administratës Publike, me synimin për të forcuar funksionimin e administratës shtetërore dhe për të avancuar procesin e integrimit europian të vendit. Rama ka shprehur besimin se ministrja e Shtetit për Administratën Publike, Adea Pirdeni, do të udhëheqë institucionin e ri.
TIRANË – Qeveria shqiptare pritet të krijojë javën e ardhshme Ministrinë e Administratës Publike, një institucion i ri që do të ketë në fokus administrimin dhe modernizimin e shërbimeve shtetërore.
Lajmin e ka bërë të ditur kryeministri Edi Rama gjatë fjalës së tij në prezantimin e “Shkallës së Meritës”, ku e cilësoi administratën publike si një nga fushat qendrore të punës së qeverisë dhe të procesit të ndërtimit të shtetit europian.
Sipas Ramës, krijimi i një ministrie të dedikuar do të mundësojë zgjerimin e përgjegjësive, detyrave dhe objektivave në funksion të zhvillimit të administratës shtetërore.
“Dua ta ndaj me ju sot që do të krijojmë javën e ardhshme ministrinë e Administratës Publike, pikërisht sepse tanimë më tema e administratës publike është një temë shumë qendrore e punës së qeverisë dhe e shtetbërjes së mëtejshme europiane të Shqipërisë. Është nevoja që përmes Ministrisë së Administratës Publike, një model që e kanë dhe shumë vende të tjera europiane, ne të zgjerojmë gamën e detyrave, gamën e punëve, gamën e ambicieve për të ngritur më lart shtetin europian të shqiptarëve”, deklaroi Rama.
Adea Pirdeni pritet të jetë në krye të ministrisë së re
Gjatë fjalës së tij, kryeministri vlerësoi punën e ministres së Shtetit për Administratën Publike, Adea Pirdeni, duke shprehur bindjen se ajo është personi që mund ta udhëheqë procesin e krijimit dhe funksionalizimit të institucionit të ri.
Rama vlerësoi përkushtimin e saj në trajtimin e çështjeve që lidhen me administratën publike dhe theksoi rëndësinë e vazhdimësisë së punës së nisur deri më tani.
“Nuk diskutohet që Ministrinë e Administratës Publike mund ta drejtojë dhe ta çojë përpara vetëm ministrja e Shtetit për Administratën Publike. Adea të falënderoj për përkushtimin, për faktin që asnjëherë nuk i jep lirë fjalët e mira, as fjalët e këqija, por je gjithmonë e angazhuar që çdo fjalë apo çështje që trajton të mos bjerë në tokë. Kam shumë besim që me këtë bazë që është ndërtuar, me çdo gur kilometrik që ke vendosur, do arrish që ministrinë e Administratës Publike të Republikës së Shqipërisë ta kthesh në një institucion model siç duhet të jetë model administrata publike”, u shpreh kryeministri.
Administrata publike, pjesë e agjendës së integrimit europian
Krijimi i Ministrisë së Administratës Publike synon t’i japë kësaj fushe një rol më të përcaktuar në strukturën qeveritare, në një periudhë kur Shqipëria po vijon procesin e integrimit në Bashkimin Europian.
Modernizimi i administratës, përmirësimi i shërbimeve për qytetarët, profesionalizmi i punonjësve publikë dhe forcimi i sistemit të meritës janë ndër çështjet që lidhen me funksionimin e një administrate moderne dhe efikase.
Gjatë prezantimit të “Shkallës së Meritës”, Rama vuri theksin te nevoja për të ndërtuar mbi bazën e punës së deritanishme dhe për të zgjeruar ambiciet institucionale në këtë drejtim.
Njoftimi për krijimin e ministrisë së re shënon një zhvillim në organizimin e administratës qeveritare shqiptare. Detajet mbi strukturën, kompetencat dhe funksionimin e institucionit pritet të bëhen të ditura në vijim, transmeton rtsh.
