I pranishëm në punimet e sesionit të 80-të të Asamblesë së Përgjithshme të Kombeve të Bashkuara, Presidenti Bajram Begaj ka zhvilluar një takim me Sekretarin e Përgjithshëm të OKB-së, Antonio Guterres.
Në një postim në rrjete sociale, teksa ka publikuar foto nga takimi, Begaj e konsideron bisedën mes tyre si “miqësore”.
Sipas Presidentit, biseda u fokusua në rolin aktiv të vendit tonë në ruajtjen e paqes dhe sigurisë dhe mbrojtjen e të drejtave të njeriut.
“Kënaqësi të takoj Sekretarin e Përgjithshëm të OKB-së Antonio Guterres si pjesë e punimeve të Sesionit të 80-të të Asamblesë së Përgjithshme të Kombeve të Bashkuara. Biseda miqësore u fokusua në rolin aktiv të Shqipërisë në ruajtjen e paqes dhe sigurisë, promovimin e zhvillimit të qëndrueshëm dhe mbrojtjen e të drejtave të njeriut. I shpreha mirënjohjen time Sekretarit të Përgjithshëm Guterre për udhëheqjen e tij gjatë këtyre kohërave sfiduese për Organizatën dhe multilateralizmin”, shkruan Begaj, transmeton rtsh.
