Lionel Messi i ka dhënë lamtumirën fanellës së Argjentinës në një natë të paharrueshme në “Monumental”. Përballë rreth 85 mijë tifozëve, kampioni argjentinas zhvilloi ndeshjen e tij të fundit me kombëtaren në këtë stadium, duke mbyllur një kapitull 21-vjeçar të mbushur me emocione, trofe dhe rekorde.
Argjentina e mposhti Beninin 3-0 në këtë ndeshje miqësore, por rezultati mbeti në plan të dytë përballë ceremonisë së lamtumirës së një prej futbollistëve më të mëdhenj në historinë e vendit. Messi ishte protagonist edhe në fushë. Kapiteni dha dy asistime dhe realizoi një gol nga pika e bardhë, ndërsa golat e tjerë të Argjentinës u shënuan nga Nicolas Otamendi dhe Nico Paz.
Por mbrëmja në “Monumental” ishte shumë më tepër se një ndeshje futbolli.
Para fillimit të takimit, Messi zbriti në fushë së bashku me tre djemtë e tij, ndërsa në stadium u shpalos një fanellë gjigante me numrin 10 dhe mbishkrimin “Gracias”. Tifozët argjentinas e shoqëruan ceremoninë me kore, lot, drita dhe fishekzjarre. Në tribuna ishin edhe tifozë të ardhur nga vende të ndryshme të botës, të cilët kishin udhëtuar mijëra kilometra për të qenë dëshmitarë të një prej momenteve më emocionuese të futbollit argjentinas. Për Messin, kjo ndeshje kishte edhe një dimension personal. Ishte paraqitja e tij e parë me Argjentinën pas ndarjes nga jeta të babait të tij, Jorge Messi, në gusht. Emocionet ishin të dukshme që në fillim, ndërsa edhe trajneri Lionel Scaloni nuk arriti t’i mbante lotët.
Messi shpërthen në pjesën e dytë
Pjesa e parë nuk ishte ndër më të mirat e Messit. Ylli argjentinas humbi një mundësi të pastër dhe pati disa pasime të pasakta, ndërsa Benini tregoi se nuk kishte ardhur në Buenos Aires vetëm për të qenë pjesë e ceremonisë. Skuadra afrikane krijoi disa mundësi të rrezikshme, me Junior Olaitan që iu afrua golit, por Emiliano Martinez ishte në vendin e duhur për ta mbajtur portën e Argjentinës të paprekur. Në pjesën e dytë, gjithçka ndryshoi. Messi mori përsëri rolin e protagonistit. Fillimisht asistoi Nicolas Otamendin për golin e parë, përpara se të shërbente Nico Pazin, i cili realizoi një gol spektakolar. Më pas erdhi momenti i Messit. Kapiteni fitoi dhe realizoi një penallti, duke vendosur rezultatin përfundimtar 3-0. Gjatë pjesës së dytë ai pati edhe raste të tjera, përfshirë një goditje që përfundoi në shtyllë.
21 vite histori me fanellën bardhekaltër
Kjo ishte paraqitja e 208-të e Lionel Messit me Argjentinën. Në 21 vite me kombëtaren, ai ka realizuar 126 gola dhe 67 asistime, duke vendosur rekorde që e kanë futur emrin e tij në historinë e futbollit argjentinas. Rruga e Messit me kombëtaren nuk ka qenë gjithmonë e lehtë. Për vite me radhë ai u përball me kritika dhe zhgënjime, sidomos pas humbjeve në finalet e mëdha. Por gjithçka ndryshoi në vitin 2021, kur Argjentina fitoi Kupën e Amerikës. Një vit më pas erdhi momenti më i madh: Messi udhëhoqi Argjentinën drejt triumfit në Kupën e Botës në Katar, duke fituar trofeun që i kishte munguar më shumë se çdo tjetër. Në këtë rrugëtim, përkrah tij ishte trajneri Lionel Scaloni. Dy Lionelët ndërtuan një epokë të re të futbollit argjentinas dhe së bashku fituan trofetë më të rëndësishëm të viteve të fundit.
Një dhuratë nga Benini dhe një lamtumirë simbolike
Edhe kombëtarja e Beninit u bë pjesë e ceremonisë. Kapiteni Sessi D’Almeida i dhuroi Messit një statujë të vogël të artë që simbolizon luftëtaret e Dahomeyt, si shenjë respekti për kapitenin argjentinas. Në fund të ndeshjes, “Monumental” u kthye në një skenë të madhe lamtumire. Tifozët kënduan, stadiumi u mbush me drita dhe fishekzjarre, ndërsa Messi përshëndeti për herë të fundit publikun argjentinas si lojtar i kombëtares.
Një epokë e jashtëzakonshme mori fund mes lotësh, duartrokitjesh dhe një fjale të vetme: “Gracias”.
Pas 21 vitesh, Lionel Messi largohet nga kjo skenë me trofe, rekorde dhe një histori që tashmë është pjesë e pandashme e futbollit argjentinas. /BS
