Tiranë – Plazhet e kristalta, malet, qytetet historike dhe trashëgimia e veçantë kulturore po e shndërrojnë Shqipërinë në një prej destinacioneve turistike më tërheqëse të Ballkanit. Kështu shkruan gazetari Luc Rongier në një artikull të publikuar në median franceze “Ulysse.com”, ku Shqipëria përshkruhet si një vend që, pas dekadash izolimi, po përjeton një rritje të ndjeshme të numrit të turistëve. Sipas të dhënave të Organizatës së Turizmit të Kombeve të Bashkuara, Shqipëria priti rreth 11.9 milionë vizitorë në vitin 2025, shifër që përfaqëson një rritje prej 3.3 për qind krahasuar me vitin 2024 dhe 93.6 për qind më shumë se në vitin 2019. Rritja e turizmit po lidhet me zgjerimin e ofertës turistike, zhvillimin e infrastrukturës dhe shtimin e lidhjeve ajrore me qytete të ndryshme evropiane.
Nga izolimi te turizmi ndërkombëtar
Artikulli francez e lidh zhvillimin e turizmit shqiptar edhe me historinë politike të vendit. Për dekada me radhë, Shqipëria ishte një prej vendeve më të izoluara të Evropës, veçanërisht gjatë regjimit komunist të Enver Hoxhës. Pas rënies së komunizmit dhe hapjes së vendit, turistët e huaj nisën ta zbulojnë gradualisht Shqipërinë. Sot, sipas “Ulysse.com”, plazhet, qytetet historike dhe shtigjet malore janë ndër arsyet kryesore që po tërheqin gjithnjë e më shumë vizitorë.
Fluturimet e lira e afrojnë Tiranën me Evropën
Një rol të rëndësishëm në rritjen e turizmit ka luajtur edhe zgjerimi i Aeroportit Ndërkombëtar të Tiranës dhe shtimi i linjave ajrore. Artikulli veçon hapjen e bazës së kompanisë Wizz Air në Tiranë në vitin 2020, e cila ka krijuar lidhje me një numër qytetesh evropiane, përfshirë Barcelonën, Budapestin, Londrën, Madridin, Romën dhe Stokholmin. Tirana ka gjithashtu lidhje direkte ajrore me qytete si Frankfurti, Amsterdami dhe Stambolli, ndërsa disa prej këtyre linjave funksionojnë në mënyrë sezonale. Krahas transportit ajror, kryeqyteti shqiptar është i lidhur me autobus me qytete të rajonit, përfshirë Shkupin, Ohrin, Podgoricën, Budvën, Prishtinën dhe Prizrenin. Kjo u mundëson turistëve të ndërthurin Shqipërinë me destinacione të tjera të Ballkanit.
Tirana, histori dhe gjurmë të së kaluarës
Në artikull, Tirana paraqitet si një qytet ku ndërthuren historia shqiptare dhe zhvillimi modern. Një prej pikave kryesore është Sheshi “Skënderbej”, i cili mban emrin e heroit kombëtar shqiptar. Pranë tij ndodhet Muzeu Historik Kombëtar, i cili aktualisht është i mbyllur për rikonstruksion, ndërsa fasada dhe mozaiku i tij vazhdojnë të jenë pjesë e peizazhit të kryeqytetit. Për turistët që duan të njohin periudhën komuniste, artikulli përmend Shtëpinë me Gjethe, si dhe Bunk’Art 1 dhe Bunk’Art 2. Edhe bunkerët e shumtë të ndërtuar gjatë regjimit komunist mbeten një prej elementeve më karakteristike të trashëgimisë së kësaj periudhe. Ndërkohë, Kalaja e Tiranës, e njohur si Fortesa e Justinianit, është shndërruar në një hapësirë me restorante, kafene dhe dyqane.
Shkodra, porta drejt Alpeve Shqiptare
Në veri, artikulli veçon Shkodrën si një prej pikave më të rëndësishme për turistët që duan të eksplorojnë natyrën shqiptare. Liqeni i Shkodrës, i cili shtrihet edhe në territorin e Malit të Zi, ofron mundësi për eksplorim në këmbë apo me biçikletë, ndërsa Kalaja e Rozafës mbetet një prej monumenteve më të njohura të zonës. Nga Shkodra mund të organizohen udhëtime drejt lumit të Shalës dhe Liqenit të Komanit, ndërsa zona shërben edhe si portë hyrëse drejt Alpeve Shqiptare. Një prej itinerareve më të njohura është shtegu Valbonë–Theth, rreth 12 kilometra i gjatë, që përshkon Qafën e Valbonës dhe peizazhe malore.
Riviera, motori i turizmit veror
Një pjesë e rëndësishme e artikullit i kushtohet Rivierës Shqiptare, e cila është bërë një prej simboleve kryesore të turizmit në vend. Ujërat e kthjellëta, plazhet dhe peizazhet bregdetare kanë bërë që Riviera Shqiptare të marrë edhe nofkën “Maldivet e Evropës”. Vlora, Dhërmiu, Saranda dhe Ksamili përmenden ndër destinacionet më të frekuentuara nga turistët, ndërsa zhvillimi i sektorit shoqërohet me shtimin e strukturave të reja akomoduese. Në vitet e fundit janë hapur edhe hotele të markave ndërkombëtare. Ndër to përmenden “Green Coast Hotel – MGallery Collection”, i hapur në qershor 2025, dhe “Crowne Plaza Durrës by IHG”, i inauguruar në vitin 2026. Në ofertën luksoze të bregdetit shqiptar përmendet gjithashtu “Miamar Luxury Hotel & Spa”.
Shqipëria, nga destinacion alternativ në një emër të njohur turistik
Rritja e numrit të turistëve dhe zgjerimi i infrastrukturës turistike po ndryshojnë me shpejtësi profilin e Shqipërisë në hartën turistike evropiane. Nga Alpet në veri te Riviera në jug, nga trashëgimia historike e Tiranës dhe Shkodrës te plazhet e jugut, Shqipëria po ofron një kombinim gjithnjë e më të gjerë për vizitorët ndërkombëtarë. Artikulli i “Ulysse.com” e paraqet këtë transformim si një prej zhvillimeve më të rëndësishme të turizmit shqiptar, duke vënë në pah një vend që për një kohë të gjatë ishte i izoluar, por që sot po tërheq miliona vizitorë nga e gjithë Evropa dhe më gjerë, transmeton euronewsal.
