Ministri në detyrë i Mbrojtjes, Ejup Maqedonci, ka zhvilluar një takim me Ambasadorin e Britanisë së Madhe në Kosovë, Jonathan Hargreaves, ku në fokus të diskutimit ishte thellimi i bashkëpunimit dypalësh në fushën e mbrojtjes.
Përmes një njoftimi në rrjete sociale, Maqedonci e cilësoi takimin si të frytshëm, duke bërë të ditur se është biseduar për forcimin e bashkëpunimit në ndërtimin e kapaciteteve mbrojtëse, proceset e prokurimit si dhe angazhimin e përbashkët në misione dhe iniciativa ndërkombëtare.
“Takim i frytshëm me Ambasadorin e Britanisë së Madhe në Kosovë, Jonathan Hargreaves, ku diskutuam për forcimin e bashkëpunimit në fushën e mbrojtjes, ndërtimin e kapaciteteve, prokurimet dhe angazhimin e përbashkët në misione dhe iniciativa ndërkombëtare”, ka shkruar Maqedonci.
Ai ka publikuar edhe fotografi nga takimi, duke theksuar rëndësinë e partneritetit strategjik me Mbretërinë e Bashkuar në avancimin e kapaciteteve të Forcës së Sigurisë së Kosovës dhe në rritjen e kontributit të Kosovës në misione ndërkombëtare.
Bashkëpunimi ndërmjet Kosovës dhe Britanisë së Madhe në fushën e mbrojtjes konsiderohet një ndër shtyllat kryesore të partneritetit mes dy vendeve, me fokus në trajnime, shkëmbim përvojash dhe mbështetje për zhvillimin profesional të strukturave të sigurisë, transmeton rtk.
