Kuvendi ka miratuar me 92 vota pro deklaratën e përbashkët për “Pafajësi për udhëheqësit e Ushtrisë Çlirimtare të Kosovës”.
Kërkesa për votimin e kësaj deklarate në mbështetje të 4 ish-udhëheqësve të UÇK-së, për të cilët në Prokuroria në Hagë ka kërkuar në total 180 vite burg, u propozua nga kreu i grupit parlamentar socialist Taulant Balla. Ky u fundit u shpreh se kjo deklaratë është në konsekuencë të plotë me qëndrimet e Partisë Socialiste në 35 vite sa i përket çështjeve që lidhen me Kosovën, me pastërtinë e luftës së UCK në Kosovë dhe që lidhen me faktet që çuan në krijimin e kësaj gjykate dhe për fat të keq dhe në këtë kërkesë përfundimtare të prokurorisë speciale ndaj drejtuesve të UCK-së.
“Sikur sot të ishte gjallë heroi ynë kombëtar Adem Jashari dhe ai duhej të dënohej me 45 vite burg sepse luftoi për lirinë e vendit të vetë.
Nuk ka asnjë dyshim për gjithë kombet e lira se është një batërdi e tmerrshme dhe një baltë në vijim të baltave që janë hedhur në 27 vite kundër luftës çlirimtare në Kosovë”, deklaroi Balla.
Gjatë prezantimit të deklaratës në Kuvend, deputeti Igli Hasani u shpreh se Parlamenti i Shqipërisë shpreh shqetësim të thellë për kërkesën përfundimtare të Prokurorisë Speciale në Hagë ndaj ish-drejtuesve të UÇK-së, Hashim Thaçi, Jakup Krasniqi, Kadri Veseli dhe Rexhep Selimi.
Sipas tij, Kuvendi rithekson se Ushtria Çlirimtare e Kosovës ishte një lëvizje legjitime çlirimtare, që luftoi për liri, dinjitet dhe vetëvendosje, në përputhje me të drejtën ndërkombëtare. Ai theksoi se ekziston rreziku i shtrembërimit të historisë, duke barazuar luftën e UÇK-së me krimet e regjimit të Millosheviçit, i cili kreu spastrim etnik dhe krime kundër njerëzimit në Kosovë.
Në deklaratë, Kuvendi shpreh mbështetje të plotë për ish-drejtuesit e UÇK-së dhe kërkon që procesi në Hagë të jetë i drejtë dhe i paanshëm, pa cenuar dinjitetin e luftës çlirimtare. Po ashtu, nënvizohet legjitimiteti i ndërhyrjes së NATO-s në vitin 1999 dhe vlerësohen dëshmitë e figurave ndërkombëtare që kanë mbështetur kauzën e Kosovës.
“Kuvendi i Republikës së Shqipërisë deklaron:
Mbështetjen e plotë dhe të pakushtëzuar për drejtuesit e Ushtrisë Çlirimtare të Kosovës, të cilët ishin dhe mbeten përfaqësues të aspiratave të drejta të popullit të Kosovës për liri dhe vetëvendosje. Lufta e tyre ishte luftë e drejtë, e mbështetur në parimet universale të të drejtave të njeriut.
Kërkesën drejtuar Dhomave të Specializuara në Hagë, komunitetit ndërkombëtar dhe institucioneve të drejtësisë ndërkombëtare që të deklarojnë pafajësinë e Hashim Thaçit, Jakup Krasniqit, Kadri Veselit dhe Rexhep Selimit përmes një procesi të drejtë dhe të paanshëm, që respekton dhe nuk cënon dinjitetin e luftës çlirimtare të popullit të Kosovës, duke mos lejuar që instrumentet e drejtësisë të shndërrohen në mjete për rishkrimin e historisë apo për barazimin e viktimës me agresorin.
Kujtimin ndaj bashkësisë ndërkombëtare se lufta e UÇK-së u zhvillua në kushtet kur regjimi i Millosheviçit po kryente spastrim etnik, krime sistematike kundër njerëzimit dhe akte genocidiale ndaj popullatës civile të Kosovës, dhe se ndërhyrja e NATO-s në vitin 1999 konfirmoi legjitimitetin e asaj lufte dhe natyrën kriminale të regjimit të Millosheviçit.
Vlerësimin e lartë për dëshmitarët ndërkombëtarë të mbrojtjes, si Wesley Clark e James Rubin, të cilët konfirmuan të drejtën e popullit të Kosovës dhe udhëheqësve të tyre për liri.
Solidaritetin e plotë me popullin e Kosovës dhe me familjet e drejtuesve të UÇK-së, duke ritheksuar se kombi shqiptar qëndron i bashkuar në mbrojtjen e të vërtetës historike dhe të dinjitetit të luftës për liri.
Angazhimin për të ndërmarrë çdo hap të nevojshëm diplomatik dhe politik në forume ndërkombëtare për të siguruar që e vërteta historike mbi luftën çlirimtare të Kosovës të mos cënohet dhe që drejtësia të ushtrohet në mënyrë të drejtë“, thuhet në deklaratë.
Po ashtu, Hasani shprehu solidaritetin e Kuvendit me popullin e Kosovës dhe angazhimin për ndërmarrjen e hapave diplomatikë për mbrojtjen e së vërtetës historike, ndërsa u bëri thirrje institucioneve shqiptare dhe atyre të Kosovës për bashkëpunim dhe koordinim në arenën ndërkombëtare.
Miratimi i kësaj deklarate të përbashkët nga Kuvendi, vjen pas kërkesës së Prokurorisë Speciale për dënimin me nga 45 vite burg secili, për katër ish-krerët e UÇK-së, Hashim Thaçi, Kadri Veseli dhe Jakup Krasniqi, dhe Rexhep Selimi.
Deklarata e plotë
Kuvendi i Republikës së Shqipërisë, në ushtrimin e kompetencave të veta kushtetuese dhe në përmbushje të rolit të vet si përfaqësues i vullnetit të popullit shqiptar, shpreh shqetësimin e thellë për kërkesën përfundimtare të Prokurorisë Speciale të Dhomave të Specializuara në Hagë ndaj drejtuesve të Ushtrisë Çlirimtare të Kosovës, Hashim Thaçi, Jakup Krasniqi, Kadri Veseli dhe Rexhep Selimi.
Kuvendi i Shqipërisë, duke mbajtur parasysh të vërtetën historike të luftës çlirimtare të shqiptarëve të Kosovës, rithekson se Ushtria Çlirimtare e Kosovës ishte një lëvizje legjitime çlirimtare që luftoi për të drejtat themelore të njeriut, për liri, dinjitet dhe vetëvendosje të popullit të Kosovës, në përputhje me parimet e së drejtës ndërkombëtare dhe Kartës së Kombeve të Bashkuara.
Kuvendi vëren me shqetësim se kërkesa e Prokurorisë Speciale rrezikon të krijojë një shtrembërim të rrezikshëm të historisë, duke barazuar luftën legjitime të një populli për mbijetesë dhe liri me krimet e regjimit serb të Millosheviçit, i cili kreu spastrim etnik dhe krime kundër njerëzimit ndaj popullit të Kosovës.
Për këtë, Kuvendi i Republikës së Shqipërisë deklaron:
- Mbështetjen e plotë dhe të pakushtëzuar për drejtuesit e Ushtrisë Çlirimtare të Kosovës, të cilët ishin dhe mbeten përfaqësues të aspiratave të drejta të popullit të Kosovës për liri dhe vetëvendosje. Lufta e tyre ishte luftë e drejtë, e mbështetur në parimet universale të të drejtave të njeriut.
- Kërkesën drejtuar Dhomave të Specializuara në Hagë, komunitetit ndërkombëtar dhe institucioneve të drejtësisë ndërkombëtare që të deklarojnë pafajësinë e Hashim Thaçit, Jakup Krasniqit, Kadri Veselit dhe Rexhep Selimit përmes një procesi të drejtë dhe të paanshëm, që respekton dhe nuk cënon dinjitetin e luftës çlirimtare të popullit të Kosovës, duke mos lejuar që instrumentet e drejtësisë të shndërrohen në mjete për rishkrimin e historisë apo për barazimin e viktimës me agresorin.
- Kujtimin ndaj bashkësisë ndërkombëtare se lufta e UÇK-së u zhvillua në kushtet kur regjimi i Millosheviçit po kryente spastrim etnik, krime sistematike kundër njerëzimit dhe akte genocidiale ndaj popullatës civile të Kosovës, dhe se ndërhyrja e NATO-s në vitin 1999 konfirmoi legjitimitetin e asaj lufte dhe natyrën kriminale të regjimit të Millosheviçit.
- Vlerësimin e lartë për dëshmitarët ndërkombëtarë të mbrojtjes, si Wesley Clark e James Rubin, të cilët konfirmuan të drejtën e popullit të Kosovës dhe udhëheqësve të tyre për liri.
- Solidaritetin e plotë me popullin e Kosovës dhe me familjet e drejtuesve të UÇK-së, duke ritheksuar se kombi shqiptar qëndron i bashkuar në mbrojtjen e të vërtetës historike dhe të dinjitetit të luftës për liri.
- Angazhimin për të ndërmarrë çdo hap të nevojshëm diplomatik dhe politik në forume ndërkombëtare për të siguruar që e vërteta historike mbi luftën çlirimtare të Kosovës të mos cënohet dhe që drejtësia të ushtrohet në mënyrë të drejtë.
Kuvendi i Republikës së Shqipërisë u bën thirrje institucioneve të shtetit Shqiptar, institucioneve të Republikës së Kosovës dhe diasporës shqiptare që të qëndrojnë të bashkuar në mbrojtjen e së vërtetës, dinjitetit dhe drejtësisë për popullin e Kosovës dhe për drejtuesit e luftës së tyre çlirimtare, Hashim Thaçi, Jakup Krasniqi, Kadri Veseli dhe Rexhep Selimi.
Kuvendi i Republikës së Shqipërisë u rekomandon qeverive të Republikës së Shqipërisë dhe të Republikës së Kosovës të bashkëpunojnë dhe koordinojnë për denoncimin ndërkombëtar të krimeve serbe.
Kjo deklaratë pasqyron vullnetin unanim të Kuvendit të Republikës së Shqipërisë dhe i transmetohet Dhomave të Specializuara në Hagë, Këshillit të Sigurimit të OKB-së, Parlamentit Evropian, Asambleve Parlamentare të NATO-s, OSBE-së dhe Këshillit të Evropës, si dhe të gjitha qeverive mike dhe partnere, transmeton rtsh.
