ZAGREB/HAGË – Ministria e Punëve të Jashtme e Kroacisë ka reaguar pas vendimit të Gjykatës Speciale në Hagë për dënimin në shkallë të parë të katër ish-krerëve të Ushtrisë Çlirimtare të Kosovës (UÇK), duke theksuar se vendimi nuk duhet të paragjykojë epilogun përfundimtar të procesit gjyqësor.
Në një reagim të publikuar në llogarinë zyrtare në rrjetin social X, diplomacia kroate tha se përgjegjësia individuale penale duhet të trajtohet veçmas nga konteksti historik i luftës në Kosovë.
“Kjo aktgjykim nuk e ndryshon kontekstin historik të luftës në Kosovë apo faktin se Kosova dhe popullsia e saj ishin viktima të represionit dhe krimeve të rënda nga regjimi i Millosheviçit”, thuhet në reagimin e ministrisë.
Ministria e Punëve të Jashtme e Kroacisë theksoi gjithashtu se nuk dëshiron të paragjykojë përfundimin e procesit, duke pasur parasysh se vendimi është marrë në shkallë të parë.
Sipas qëndrimit të shprehur nga Zagrebi, përgjegjësia individuale e një personi nuk duhet të përdoret për të relativizuar krimet e kryera gjatë luftës në Kosovë apo për të vënë në pikëpyetje statusin e Kosovës.
“Përgjegjësia individuale e një personi nuk mund të shërbejë si bazë për relativizimin e atyre krimeve apo për vënien në dyshim të lirisë dhe pavarësisë së Kosovës”, thuhet më tej në reagim.
Deklarata e Kroacisë vjen në një moment kur vendimi i shkallës së parë ndaj ish-krerëve të UÇK-së pritet të ndiqet nga procedurat e mëtejshme gjyqësore. Qëndrimi i Zagrebit veçon, në këtë kuadër, përgjegjësinë individuale penale nga vlerësimi i përgjithshëm historik i luftës së Kosovës dhe pasojave të saj.Vendimi i Gjykatës Speciale dhe reagimet që kanë pasuar pritet të vazhdojnë të jenë pjesë e debatit publik dhe politik në Kosovë dhe në rajon./TCH
