Nga Angela Kosta
Në një kohë kur dezinformimi dhe presionet politike sfidojnë besueshmërinë e medias, gazetaria e përgjegjshme mbetet një nga shtyllat kryesore të demokracisë. Në këtë intervistë, gazetari dhe studiuesi i medias Dr. Dimitrios Kannavos flet për rrugëtimin e tij profesional, rolin e gazetarisë investigative në mbrojtjen e të drejtave të njeriut dhe rëndësinë e bashkëpunimit ndërkombëtar midis gazetarëve. Si themelues i iniciativave mediatike dhe anëtar i strukturave të rëndësishme profesionale në Evropë, ai ndan përvojën e tij mbi sfidat që përballen sot gazetarët – nga ruajtja e pavarësisë editoriale deri te mbrojtja e burimeve dhe lufta kundër dezinformimit. Për Dr. Kannavos, gazetaria nuk është vetëm profesion, por një përgjegjësi qytetare globale në shërbim të së vërtetës dhe shoqërisë.
Përshëndetje Dr. Dimitrios. Mund të na përshkruani rrugëtimin tuaj profesional, duke theksuar fazat që kanë kontribuar më së shumti në formimin tuaj në fushën e gazetarisë ndërkombëtare?
Rrugëtimi im profesional në gazetari është formësuar nga një angazhim i thellë për raportimin me interes publik, dialogun ndërkombëtar dhe punën investigative. Gjatë gjithë këtyre viteve kam punuar në fusha të ndryshme të medias, përfshirë gazetarinë investigative, gazetarinë ndërkombëtare, diplomacinë kulturore dhe strategjinë e mediave digjitale. Një moment kyç në karrierën time ka qenë themelimi dhe drejtimi i Hellenic Group Media, një iniciativë e përkushtuar ndaj gazetarisë së përgjegjshme, bashkëpunimit ndërkombëtar dhe promovimit të vlerave demokratike. Përmes kësaj pune kam pasur mundësinë të bashkëpunoj me gazetarë, akademikë dhe personalitete kulturore në mbarë Evropën dhe Shtetet e Bashkuara. Një tjetër hap i rëndësishëm ka qenë zhvillimi i Hellenic Los Angeles Network, i cili synon të ndërtojë ura lidhëse midis Greqisë, diasporës greke dhe komunitetit krijues ndërkombëtar. Këto iniciativa kanë forcuar kuptimin tim për gazetarinë jo vetëm si profesion, por edhe si përgjegjësi qytetare globale.
Ju e konceptoni gazetarinë si një mision përgjegjësie dhe shërbimi ndaj shoqërisë. Në ç’mënyrë ky vizion udhëheq punën tuaj profesionale?
Për mua, gazetaria është thelbësisht një shërbim publik. Roli i gazetarit nuk është vetëm të informojë, por edhe të mbrojë vlerat demokratike, t’i japë zë shoqërisë dhe të kontribuojë në transparencë dhe llogaridhënie. Gazetaria e përgjegjshme kërkon pavarësi, integritet etik dhe respekt për të vërtetën. Në një epokë ku dezinformimi përhapet me shpejtësi, gazetarët duhet të veprojnë si mbrojtës të informacionit të besueshëm. Për këtë arsye, puna ime synon të promovojë një gazetari që i shërben shoqërisë dhe jo pushtetit.
Në lidhje me marrëdhëniet ndërkombëtare dhe gazetarinë investigative, cilat mendoni se janë sfidat kryesore sot në aspektin e pavarësisë, saktësisë dhe mbrojtjes së burimeve?
Një nga sfidat më të mëdha sot është ruajtja e pavarësisë editoriale në një mjedis ku presionet ekonomike, ndikimi politik dhe dezinformimi digjital po ndikojnë gjithnjë e më shumë në media. Gazetaria investigative përballet gjithashtu me rreziqe në rritje, veçanërisht sa i përket mbrojtjes së burimeve dhe sigurisë së informacionit. Gazetarët duhet të veprojnë në kontekste gjeopolitike komplekse, ku informacioni mund të manipulohet ose të përdoret si armë. Për t’u përballur me këto sfida, nevojiten standarde të forta etike dhe ligjore, si dhe bashkëpunim ndërkombëtar midis mediave dhe organizatave profesionale.
Duke trajtuar çështje që lidhen me veprimin humanitar dhe mbrojtjen civile, cilat parime i konsideroni thelbësore për të garantuar një raportim të saktë dhe të përgjegjshëm?
Kur bëhet fjalë për krizat humanitare, gazetarët duhet t’i japin përparësi saktësisë, dinjitetit njerëzor dhe kuptimit kontekstual. Është e rëndësishme të shmanget sensacionalizmi dhe të sigurohet që raportimi të pasqyrojë realitetin me të cilin përballen popullsitë e prekura. Gazetaria duhet të theksojë dimensionin njerëzor të krizave, por njëkohësisht të ofrojë informacion të verifikuar dhe të balancuar. Po ashtu, gazetarët duhet të jenë të vetëdijshëm për përgjegjësinë etike që lidhet me raportimin në mjedise të ndjeshme, veçanërisht kur përfshihen komunitete të pambrojtura.
Si anëtar i Komitetit të Mbikëqyrjes së Shoqatës Evropiane të Gazetarëve – Seksioni Helenik, cilat iniciativa i konsideroni prioritare për forcimin e etikës dhe cilësisë së informacionit në Evropë?
Roli im në këtë strukturë përqendrohet në mbikëqyrje, transparencë dhe përgjegjësi institucionale. Komiteti është përgjegjës për kontrollin financiar dhe monitorimin e veprimtarisë së organizatës për të garantuar integritet dhe transparencë. Megjithatë, në një kuptim më të gjerë, besoj se forcimi i gazetarisë etike në Evropë kërkon trajnim të vazhdueshëm profesional, mbështetje për gazetarinë e pavarur dhe mekanizma të fortë për transparencë dhe llogaridhënie brenda organizatave mediatike.
Si themelues dhe anëtar i Unionit Ndërkombëtar të Gazetarëve të Kretës dhe Media Masive, çfarë roli i atribuoni bashkëpunimit ndërkombëtar midis profesionistëve të medias?
Bashkëpunimi ndërkombëtar midis gazetarëve është thelbësor në botën e sotme të ndërlidhur. Profesionistët e medias duhet të punojnë së bashku për të ndarë njohuri, për të mbrojtur lirinë e shtypit dhe për të forcuar standardet profesionale. Organizatat që promovojnë këtë bashkëpunim krijojnë rrjete të rëndësishme që u mundësojnë gazetarëve të shkëmbejnë perspektiva dhe të përballen kolektivisht me sfida globale.
Në një kontekst global të karakterizuar nga rritja e dezinformimit, çfarë kontributi mund të ofrojnë institucionet gazetareske për të mbrojtur besueshmërinë e informacionit?
Institucionet gazetareske duhet të promovojnë etikën profesionale, të mbështesin gazetarinë investigative dhe të forcojnë mekanizmat e verifikimit të fakteve. Gjithashtu, është shumë e rëndësishme investimi në edukimin mediatik dhe digjital të qytetarëve, në mënyrë që ata të jenë më të përgatitur për të dalluar informacionin e besueshëm nga ai i rremë. Në fund të fundit, besueshmëria e gazetarisë varet nga transparenca, përgjegjësia dhe respektimi i vazhdueshëm i parimeve etike.
Sipas jush, cila është marrëdhënia midis gazetarisë investigative dhe mbrojtjes së të drejtave të njeriut në shoqërinë bashkëkohore?
Gazetaria investigative është e lidhur ngushtë me mbrojtjen e të drejtave të njeriut. Duke zbuluar abuzimet me pushtetin, korrupsionin dhe shkeljet e lirive themelore, ajo kontribuon në një demokraci më të përgjegjshme. Në shumë raste, gazetarët veprojnë si “rojtarë” të shoqërisë, duke tërhequr vëmendjen mbi çështje që përndryshe mund të mbeteshin të fshehura. Ky rol është thelbësor për mbrojtjen e lirisë qytetare dhe të drejtësisë.
Duke vëzhguar evolucionin e peizazhit mediatik, cilat transformime i konsideroni më domethënëse për të ardhmen e profesionit tuaj?
Transformimet më të rëndësishme lidhen me digjitalizimin e shpejtë të medias, shfaqjen e platformave të reja të komunikimit dhe qarkullimin global të informacionit në kohë reale. Këto zhvillime krijojnë mundësi të reja për gazetarinë, por edhe sfida që lidhen me dezinformimin, qëndrueshmërinë ekonomike të mediave dhe besimin e publikut. E ardhmja e gazetarisë do të varet nga aftësia e mediave për t’u përshtatur me teknologjinë duke ruajtur vlerat themelore etike.
Çfarë mesazhi dëshironi t’u transmetoni brezit të ri të gazetarëve?
Brezit të ri të gazetarëve do t’u thosha se integriteti është pasuria jonë më e çmuar. Në një botë plot zhurmë dhe konkurrencë, përkushtimi ndaj së vërtetës dhe raportimit etik duhet të mbetet parimi ynë udhëheqës. Gazetaria kërkon guxim, kuriozitet dhe përgjegjësi. Gazetarët e rinj duhet të vazhdojnë të kërkojnë dijen, të mbeten të pavarur në mendimin e tyre dhe të kujtojnë gjithmonë se gazetaria është në shërbim të shoqërisë.
Ju falenderoj për intervistën.
Faleminderit juve Angela dhe të gjithë lexuesve shqiptarë.
BIOGRAFIA
Dr Dimitrios Kannavos është gazetar i njohur dhe një figurë aktive në fushat e medias, kulturës dhe shërbimit publik. Anëtar i Komitetit të Auditimit të Shoqatës Së Gazetarëve Evropian – Seksioni Helenik, si dhe themelues e anëtar i Unionit Ndërkombëtar të Gazetarëve të Kretës dhe Media Masive, ka kontribuar ndjeshëm në përparimin e standardeve gazetareske dhe në bashkëpunimin ndërkombëtar.
Gjatë karrierës së tij, është vlerësuar me shumë çmime kombëtare dhe ndërkombëtare për punën, shërbimin ndaj komunitetit dhe përkushtimin në promovimin kulturor.
-Çmime dhe vlerësime
-Çmim për Vullnetarizmin për promovimin e vullnetarizmit, kulturës dhe sportit.
-Çmimi i Unionit Qendror të Bashkive (KEDE) për kontributin e tij shoqëror.
-Çmim nderi nga Maratona e 13-të “Aleksandri i Madh” për mbështetje të jashtëzakonshme
ndaj komunitetit.
-Vlerësim nderi nga Help Hellas për kontributin e tij si sponsor i komunikimit.
-Çmim gazetaresk për gazetari investigative cilësore – “Ethos Gyres” (Çmimi Mimis
Papanayiotou) nga Unioni Ekumenik Delfik.
-Tre çmime ndërkombëtare në gazetari, ndër të cilat:
1) Global Excellence in Leadership
2) Kontribute në median informative.
3) Çmime letrare
- Çmimi “Artist, 2025″
Vlerësime në festivale kinematografike, përfshirë çmime për rolin e tij si anëtar jurie në Bridges International Film Festiva dhe në Cyprus Festival Internazionale del Cinema (CYIFF). Përmes punës së tij gazetareske, angazhimit kulturor dhe mbështetjes së iniciativave ndërkombëtare mediatike, Dr Dimitrios Kannavos vazhdon të promovojë gazetarinë etike, - shërbimin publik dhe fuqizimin e komuniteteve ndërkombëtare.
Intervistoi dhe përgatiti: Angela Kosta gazetare, shkrimtare, poete, eseiste, redaktore, kritike letrare, botuese, promovuese ndërkombëtare
HelveticALForum.ch
