Mbëmja kushtuar Festës së Mësuesit dhe Gruas do të mblidhte së bashku komunitetin shqiptar të Filadelfias organizuar nga shoqata “ Bijtë e shqipes”. Që në hyrje të zbukuruar me shumë finesë nga znj. Erina Hasa, do të dhuroheshin karajfila të kuq për cdo grua, vajzë, symbol i respektit dhe mirënjohjes për to. Këto lule u sponsorizuan nga z. Bujar Çela , anëtar i KD. Aktiviteti do të çelej me surprizën më të bukur të përgatitur nga nxënësi i shkolles shqipe Christofer Papaciu, I cili do të sillte aq bukur poezinë e Fadil Krajës, kushtuar nënës. Atmosfera do ndizej që në fillim me ritmin e valles “ Baresha” të interpretuar me shume hijeshi nga nxënëset dhe ish-nënëset e shkollës shqipe “ Gjuha jonë” të përgatitur me shume profesionalizëm nga znj. Sonja Ponoçi Zebib.
Në hyrje të aktivitetit pas përshëndetjes dhe urimit të përzemërt të Kryetarit të shoqatës z. Dritan Matraku, znj. Elda Janji do të uronte dhe përshëndeste të gjitha gratë e komunitetit shqiptar në emër të Kryesisë së Shoqatës për këto dy festa. Lule të bukura të sponsorizuara nga znj. Ida Bushi, do të jepeshin mësueseve të shkollës shqipe për kontributin dhe vlerat që ruajnë në brezin e ri të komunitetit tonë. Më pas fuqinë e morën artistët e ditës këngëtarja Mariza Ikonomi dhe Ilsi Ademi. Dy artistë që treguan jo vetëm talentin e tyre të padiskutueshëm por pasqyruan mirësi dhe respekt për të gjitha nënëat, vajzat, gratë. Spektakël në skenë ,spektal në pistë e vallëzimit. Energji që vinte nga tingujt e këngëve të Vace Zelës, të Shpat Kasapit, të Kosovës, Çamërisë, Jugut , Veriut dhe Shqiperisë së mesme.
Gjithë trojet shqiptare në një mbrëmje në këngë nga këta dy artistë plot me energji dhe talent, e të gjithë duke kërcyer pa u lodhur. Një moment i vecantë ishte vlerësimi që shoqata “ Bijtë e shqipes “ do u jepte znj. Irini Lulu, Mimoza Jahaj, Klarita Gjoleka, Arta Laco, Mirela Bani, Kaja Llari nëpërmjet Certifikatave të Mirënjohjes për kontributin dhe, ndihmesën e dhëne jo vetëm në aktivitetin e shoqatës, por edhe për ndihmesën e vyer dhëne komunitetit shqiptar në Philadelphia. Nuk munguan edhe dhuratat e sponsorizuar nga znj. Irini Lulu dhe znj. Amelia Bushaka-Gjuzi për mësueset e shkollës shqipe. Muzika dhe vallja shqiptare kanë magjinë e tyre që të mbajnë të tërhequr pas vetes. Edhe pse orari i caktuar kishte kaluar, askush nuk donte të largohej.
Gëzuar Festën e Dijes dhe të Gruas!
Me dijen e mësuesit dhe forcën e dashurisë e gruas vazhdon ardhmëria jonë e patjetërsuar dhe unike.
Rudina Bani mësuese e shkollës shqipe “Gjuha Jonë”
Fotot nga Armir Koka /GD
