Kreu i Partisë Demokratike, Sali Berisha, kërkon vijimin e aksionit opozitar dhe mobilizimin e strukturave në terren. Në takimin me grupet e punës së qarkut Tiranë, ai bëri thirrje për shndërrimin e energjisë qytetare, veçanërisht asaj rinore, në një forcë të qëndrueshme politike, ndërsa paralajmëroi se protestat do të vijojnë.
Kryetari i Partisë Demokratike, Sali Berisha, ka zhvilluar një takim në selinë blu me grupet e punës së qarkut Tiranë, ku në qendër të diskutimeve ishte vijimi i aksionit opozitar, organizimi i protestave dhe përgatitjet për zgjedhjet e ardhshme lokale.
Gjatë fjalës së tij, Berisha bëri të qartë se opozita nuk ka ndërmend të tërhiqet nga protestat, duke i cilësuar ato si një nga instrumentet kryesore të përballjes politike me qeverinë e drejtuar nga Edi Rama.
“Shpërthimi rinor të mos shkojë dëm. Ne nuk heqim dorë nga protesta, pasi protesta është pjesë e jona”, deklaroi Berisha, duke kërkuar që mobilizimi qytetar dhe angazhimi i të rinjve të vijojnë të jenë në qendër të aksionit opozitar.
Sipas kreut të demokratëve, energjia e krijuar nga pjesëmarrja qytetare duhet të shndërrohet në një forcë politike të organizuar dhe të qëndrueshme, e cila do të kontribuojë në përpjekjen e opozitës për ndryshim politik në vend.
Një tjetër fokus i takimit ishte organizimi i protestave dhe forcimi i strukturave të Partisë Demokratike në terren. Berisha kërkoi angazhim të vazhdueshëm nga drejtuesit dhe grupet e punës, duke theksuar se beteja politike kundër qeverisë duhet të shoqërohet me një organizim më të fortë në të gjitha nivelet.
Paralelisht me aksionin opozitar, kreu i PD-së kërkoi nisjen e përgatitjeve për zgjedhjet e ardhshme lokale. Sipas tij, puna organizative në terren dhe mobilizimi i strukturave duhet të ecin krahas protestave dhe përballjes politike me mazhorancën.
Në takim u diskutua gjithashtu edhe mundësia e bashkimit të faktorëve politikë dhe shoqërorë kundër qeverisë. Berisha vuri theksin te nevoja për krijimin e një fronti të përbashkët opozitar, duke e konsideruar bashkimin e forcave si një element të rëndësishëm për arritjen e objektivave politike.
“Shpresojmë të ngremë një front të përbashkët në interes të vendit”, u shpreh ai.
Takimi me grupet e punës së qarkut Tiranë vjen në kuadër të përpjekjeve të Partisë Demokratike për të konsoliduar strukturat e saj, për të mbajtur të gjallë mobilizimin opozitar dhe për të nisur përgatitjet për sfidën e ardhshme elektorale./BS
