Udhëtarët në Bashkimin Evropian do të përfitojnë mbrojtje më të qartë kur udhëtimet e tyre ndërpriten. Rregullat e reja parashohin formular standard për kërkesat për rimbursim, përgjegjësi edhe për platformat e rezervimit dhe masa shtesë për personat me aftësi të kufizuara.
Parlamenti Evropian ka miratuar rregulla të reja që synojnë forcimin e të drejtave të pasagjerëve në rastet kur udhëtimet e tyre ndërpriten, duke përcaktuar procedura më të qarta për kërkimin dhe marrjen e rimbursimeve. Sipas rregullave të miratuara, udhëtarët në të gjithë Bashkimin Evropian do të mund të përdorin një formular standard për të paraqitur kërkesat e tyre për rimbursim. Formulari pritet të publikohet në faqen zyrtare të Komisionit Evropian dhe do të jetë i disponueshëm në të gjitha gjuhët e BE-së, duke mbuluar të gjitha mënyrat e transportit. Një nga pikat kryesore të ndryshimeve është përcaktimi i afatit prej 14 ditësh për rimbursimin e plotë, si dhe qartësimi i përgjegjësive të ndërmjetësve që marrin pjesë në procesin e rezervimit të udhëtimeve.
Përgjegjësi edhe për platformat e rezervimit
Rregullat e reja përfshijnë në detyrimet e rimbursimit edhe agjencitë e udhëtimit dhe platformat online përmes të cilave pasagjerët blejnë biletat e tyre. Në legjislacionin e mëparshëm, përgjegjësitë e këtyre ndërmjetësve nuk ishin përcaktuar mjaftueshëm qartë në të gjitha rastet. Me ndryshimet e reja synohet që udhëtarët të mos përballen me paqartësi se kush duhet të merret me kthimin e parave. Nëse ndërmjetësi nuk e kryen rimbursimin brenda afatit të përcaktuar, sipas rregullave të paraqitura, linja ajrore do të jetë e detyruar të ndërhyjë dhe t’ia paguajë shumën përkatëse pasagjerit.
“Ne po i japim përparësi të drejtave të qytetarëve tanë mbi fitimet e linjave ajrore”, deklaroi socialisti italian Matteo Ricci, eurodeputeti përgjegjës për rregulloren.
Mbrojtje më e madhe për personat me aftësi të kufizuara
Ndryshimet përfshijnë edhe masa për forcimin e të drejtave të personave me aftësi të kufizuara. Në rastet kur është e nevojshme, një person shoqërues do të mund të udhëtojë pa pagesë me ta në fluturim. Kjo masë synon të lehtësojë udhëtimin e personave që kanë nevojë për ndihmë dhe të sigurojë qasje më të mirë në transportin ajror.
Sipas informacionit të paraqitur për rregulloren, udhëtimi pa pagesë i shoqëruesve është tashmë i paraparë edhe në disa forma të tjera të transportit, përfshirë autobusët, trenat dhe anijet.
Miratimi me shumicë dërrmuese
Rregullorja u miratua në Parlamentin Evropian me 652 vota pro, dy kundër dhe tetë abstenime. Ajo lidhet me një proces më të gjerë të rishikimit të të drejtave të pasagjerëve ajrorë, përmes të cilit synohet të lehtësohet marrja e rimbursimeve dhe të rritet transparenca në çmimet e biletave. Ndryshimet e përmendura përfshijnë edhe kërkesën që linjat ajrore të përfshijnë një bagazh dore falas në çmimet e paraqitura në internet, sipas rregullave të miratuara në kuadër të këtij rishikimi. Për udhëtarët, masat synojnë të krijojnë më shumë qartësi për të drejtat e tyre dhe për procedurat që duhet të ndjekin kur një udhëtim ndërpritet ose kur lind nevoja për rimbursim. Megjithatë, përpara se pasagjerët të mbështeten në këto dispozita, duhet të bëhet dallimi ndërmjet miratimit të rregullave dhe hyrjes së tyre në fuqi, pasi zbatimi konkret varet nga procedurat përkatëse ligjore dhe afatet e përcaktuara për secilën masë, transmeton euronewsal.
