Policia e Shtetit ka arrestuar 167 persona dhe ka proceduar penalisht 388 të tjerë pas protestave të dhunshme. Ndërkohë, 7 punonjës policie janë pezulluar nga detyra dhe ndaj tyre ka nisur hetimi disiplinor për tejkalim të kompetencave dhe mosrespektim të parimit të proporcionalitetit.
Policia e Shtetit ka bërë publike të dhënat mbi masat e marra pas protestave të dhunshme, duke njoftuar se 167 shtetas janë arrestuar, ndërsa 388 të tjerë janë proceduar penalisht.
Në të njëjtën kohë, 7 punonjës policie janë pezulluar nga detyra, pasi ndaj tyre ka nisur hetimi disiplinor për tejkalim të detyrës, mosrespektim të parimit të proporcionalitetit dhe mënyrën e trajtimit të një protestuesi.
Sipas deklaratës zyrtare, çdo rast i dyshuar për tejkalim të kompetencave apo shkelje të procedurave standarde do të trajtohet në përputhje me ligjin. Autoritetet kanë theksuar se punonjësit e Policisë nuk kanë marrë urdhra për të vepruar në kundërshtim me procedurat në fuqi.
132 punonjës policie të dëmtuar gjatë protestave
Gjatë deklaratës, përfaqësuesi i Policisë së Shtetit bëri të ditur se 132 punonjës policie janë dëmtuar si pasojë e përplasjeve gjatë tubimeve, kryesisht në Tiranë, por edhe në Shkodër dhe Lezhë.
Sipas tij, disa prej efektivëve vijojnë të marrin ndihmë mjekësore në spital.
Policia pretendon se gjatë protestave punonjësit e saj janë sulmuar me gurë, pllaka guri, sende metalike, mjete piroteknike dhe bomba molotov. Përballë këtyre situatave, autoritetet thonë se përdorimi i mjeteve për garantimin e rendit dhe sigurisë duhet të bëhet në përputhje me legjislacionin dhe shkallën e rrezikut.
Hetime për thirrjet për dhunë në rrjetet sociale
Një tjetër shqetësim i ngritur nga Policia e Shtetit lidhet me thirrjet për dhunë në rrjetet sociale, veçanërisht në grupe të krijuara së fundmi në platformën Telegram.
Sipas autoriteteve, në këto hapësira virtuale janë publikuar mesazhe që nxisin sulme ndaj punonjësve të Policisë, përfshirë përdorimin e lëndëve djegëse dhe plasëse. Policia pretendon se edhe gjatë paradites së sotme janë shpërndarë thirrje për sigurimin e mjeteve që mund të përdoren kundër efektivëve dhe automjeteve të tyre.
Në kuadër të hetimeve penale, strukturat përkatëse po punojnë për identifikimin dhe kapjen e personave që dyshohet se janë përfshirë në këto veprime.
Policia: Çdo shkelje do të trajtohet sipas ligjit
Në deklaratën e saj, Policia e Shtetit ka nënvizuar se punonjësit janë udhëzuar të zbatojnë procedurat standarde të punës dhe parimin e proporcionalitetit në çdo ndërhyrje, përfshirë rastet kur përballen me sulme.
Autoritetet kanë theksuar se masat e marra synojnë garantimin e rendit dhe sigurisë publike, mbrojtjen e punonjësve të Policisë dhe institucioneve shtetërore, si dhe ruajtjen e pronës publike dhe private.
Ndërkohë, hetimi disiplinor ndaj 7 efektivëve të pezulluar pritet të sqarojë rrethanat e veprimeve të tyre dhe nëse janë shkelur procedurat standarde gjatë trajtimit të protestuesve, transmeton euronewsal.
