Përgatiti Dashnim HEBIBI
Nga koha e çlirimit e deri më sot, mërgata shqiptare ka qenë një nga shtyllat kryesore të mbështetjes ekonomike, kombëtare dhe shoqërore të Kosovës. Përmes remitancave, investimeve, angazhimit politik dhe mbështetjes së vazhdueshme, bashkatdhetarët tanë që jetojnë dhe veprojnë në vende të ndryshme të botës, e veçanërisht në Zvicër, Gjermani dhe shtetet tjera perëndimore, kanë dhënë kontribut të jashtëzakonshëm për vendin e tyre. Së fundmi, veprimtari i njohur i mërgatës shqiptare në Zvicër, profesori Burhan Morina, ka publikuar një reagim në rrjetet sociale, i cili ka nxitur diskutime të shumta mes bashkatdhetarëve. Shumë prej tyre e kanë cilësuar këtë qëndrim si një pasqyrim të sinqertë të realitetit, pavarësisht nëse dikujt i pëlqen apo jo. Në reagimin e tij, profesori Morina shpreh pakënaqësinë ndaj mënyrës se si institucionet po tentojnë ta paraqesin respektin ndaj mërgatës përmes masave simbolike, siç është pagesa prej 20 eurosh për Kartonin e Gjelbër. Sipas tij, respekti ndaj mërgatës nuk matet me përfitime të vogla financiare apo me vendime të përkohshme, por me projekte konkrete dhe afatgjata që ndikojnë drejtpërdrejt në jetën e qytetarëve.
“Mërgata nuk respektohet duke ia paguar 20 euro Kartonin e Gjelbër. Ajo respektohet kur ndërtohen autostradat, kur ndërtohen spitalet për nevojat e popullit, kur krijohen kushte që mërgata të kthehet dhe të punojë në Kosovë, si dhe kur krijohen vende pune për të rinjtë”, thekson ai.
Ky mesazh prek disa nga plagët më të mëdha me të cilat vazhdon të përballet Kosova. Papunësia, emigrimi masiv i të rinjve dhe mungesa e perspektivës mbeten sfida serioze për zhvillimin e vendit. Shqetësues mbetet fakti që shumë profesionistë të rinj, përfshirë mjekë të diplomuar, vazhdojnë të presin për vite të tëra një vend pune, ndërsa në të njëjtën kohë vendi përballet me mungesë të kuadrove në sektorë të ndryshëm. Profesori Morina ngre pyetjen se si mund të flitet për respekt ndaj mërgatës, kur qindra mjekë të diplomuar nuk gjejnë mundësi punësimi në vendin e tyre, ndërsa mijëra të rinj e kanë prioritet largimin nga Kosova për të siguruar një jetë më të mirë dhe një vend pune jashtë vendit. Mesazhi i tij është gjithashtu një thirrje për përgjegjësi politike. Ai kujton se mërgata ka qenë gjithmonë e gatshme të kontribuojë dhe të japë mbështetjen e saj, përfshirë edhe në proceset zgjedhore.
“Votën ua dhamë, tash punoni me projekte afatgjata dhe strategjike, e jo me masa simbolike që nuk i zgjidhin problemet thelbësore të qytetarëve”, është mesazhi që ai përcjell.
Reagimi i profesorit Burhan Morina pasqyron mendimin e një pjese të konsiderueshme të mërgatës shqiptare, e cila kërkon më shumë zhvillim ekonomik, më shumë investime në shëndetësi, arsim dhe punësim, si dhe krijimin e kushteve që qytetarët të mos detyrohen të largohen nga vendi i tyre. Në fund të fundit, respekti ndaj mërgatës nuk matet me veprime simbolike dhe as me përfitime afatshkurtra. Ai fitohet përmes ndërtimit të një shteti funksional, ku qytetarët jetojnë me dinjitet, të rinjtë gjejnë perspektivë, profesionistët vlerësohen dhe mërgata sheh arsye reale për t’u kthyer dhe investuar në vendlindjen e saj.
