Përgatiti Dashnim HEBIBI
Akad. Prof. Dr. Abdylmenaf Bexheti, një nga emrat më të njohur të ekonomisë dhe akademisë shqiptare në Maqedoninë e Veriut dhe më gjerë, vazhdon të dëshmojë rolin e tij të rëndësishëm në shkencë. Me një karrierë të gjatë dhe të pasur si profesor universitar, ish-rektor i Universitetit të Evropës Juglindore dhe aktualisht Kryetar i Këshillit Fiskal, ai mbetet një figurë udhëheqëse që ndikon drejtpërdrejt në debatet strategjike për zhvillimin ekonomik të vendit.
Së fundmi, Prof. Bexheti ka ndarë me publikun një arritje të rëndësishme profesionale, e cila jo vetëm që pasqyron angazhimin e tij të vazhdueshëm shkencor, por edhe kontributin konkret në adresimin e sfidave aktuale ekonomike. Në bashkëpunim me Qendrën për Hulumtime Strategjike pranë Akademisë së Shkencave dhe Arteve të Maqedonisë, të drejtuar nga akademiku Taki Fiti, si dhe me pjesëmarrjen e gjerë të komunitetit akademik dhe shkencor, u organizua një prezantim i rëndësishëm i hulumtimeve më të fundit në fushën e financave publike. Ky aktivitet, i cili mblodhi studiues, ekspertë dhe përfaqësues institucionalë, përfshirë edhe Ministren e Financave Gordana Dimitrievska-Kočovska, shërbeu si një platformë e rëndësishme për diskutimin e çështjeve kyçe si efikasiteti i shpenzimeve publike, menaxhimi i deficitit buxhetor dhe niveli i borxhit publik.
Në qendër të këtij prezantimi ishte studimi me titull:
“Rregullat fiskale dhe ndikimi i tyre në bilancin fiskal të BE-27 dhe RMV – analizë empirike (2000–2024)”, një punim gjithëpërfshirës që ofron një analizë krahasuese mes vendeve të Bashkimit Evropian dhe Maqedonisë së Veriut.
Ky hulumtim është realizuar në bashkëpunim me kandidaten e doktoratës Artina Kamberi, nën mentorimin e Prof. Bexhetit, duke reflektuar edhe përkushtimin e tij në mbështetjen dhe zhvillimin e brezave të rinj akademikë.
Studimi trajton në mënyrë të detajuar ndikimin e rregullave fiskale në ruajtjen e disiplinës buxhetore dhe në arritjen e konsolidimit fiskal, duke analizuar të dhëna për një periudhë më shumë se dydekadëshe. Përmes një qasjeje empirike dhe metodologjie bashkëkohore, autorët arrijnë në përfundime të rëndësishme mbi rolin që luajnë këto rregulla në stabilizimin e financave publike, sidomos në kohë krizash dhe pasigurish ekonomike globale. Një nga dimensionet më të rëndësishme të këtij punimi është karakteri i tij aplikativ. I prezantuar në formën e një policy paper, studimi nuk mbetet vetëm në nivel teorik, por ofron rekomandime konkrete për hartuesit e politikave fiskale. Këto rekomandime janë veçanërisht të rëndësishme në kontekstin aktual global, ku ekonomitë përballen me tronditje të vazhdueshme si pasojë e rritjes së çmimeve të mallrave bazë dhe produkteve strategjike, inflacionit dhe pasigurive gjeopolitike.
Sipas Prof. Bexhetit, dizajnimi i kujdesshëm i rregullave fiskale dhe zbatimi i tyre i qëndrueshëm janë thelbësore për të siguruar një balancë të shëndoshë fiskale dhe për të parandaluar rreziqet që lidhen me rritjen e pakontrolluar të borxhit publik. Ai theksoi se përvoja e vendeve të BE-së ofron mësime të vlefshme për ekonomitë në zhvillim, përfshirë Maqedoninë e Veriut. Vlera e këtij hulumtimi pritet të rritet edhe më tej me publikimin e tij në një revistë shkencore ndërkombëtare të indeksuar në SCOPUS nga shtëpia botuese Springer, çka garanton një shpërndarje të gjerë dhe njohje ndërkombëtare të rezultateve. Njëkohësisht, studimi do të jetë i qasshëm edhe për publikun dhe institucionet vendore përmes faqes zyrtare të Këshillit Fiskal.
Në përmbyllje të këtij aktiviteti, Prof. Bexheti shprehu mirënjohjen e tij për të gjithë pjesëmarrësit, duke theksuar rëndësinë e bashkëpunimit ndërinstitucional dhe rolin e komunitetit akademik në avancimin e politikave publike. Ai veçoi kontributin e kolegëve nga Universiteti i Evropës Juglindore, duke e konsideruar këtë institucion si një vatër të rëndësishme të prodhimit të dijes dhe ekspertizës në rajon. Ky sukses i radhës konfirmon Abdylmenaf Bexheti jo vetëm si një akademik të shquar, por edhe si një zë të fuqishëm në formësimin e politikave ekonomike dhe një frymëzim të qëndrueshëm për brezat e rinj që synojnë të kontribuojnë në zhvillimin e shoqërisë.
