Ngjarjet e fundit në miqësoren mes Spanja dhe Egjipti, ku tifozët vendas kanë kënduar kore raciste ndaj ekipit mysafir, kanë rikthyer në qendër të vëmendjes një nga problemet më shqetësuese të sportit modern. Ky incident ka marrë jehonë të madhe edhe para përballjes së shumëpritur mes Atletico Madrid dhe Barcelona.
Në konferencën për shtyp, trajneri i Atleticos, Diego Simeone, e cilësoi racizmin si një fenomen që tejkalon kufijtë e futbollit dhe përfaqëson një problem të thellë shoqëror. Ai theksoi se mungesa e respektit është bërë një dukuri globale dhe se vlerat tradicionale po zbehen gjithnjë e më shumë.
“Ky nuk është problem i një vendi të vetëm. Është një çështje globale. Respekti sot ka humbur”, deklaroi Simeone, duke nënvizuar se shoqëria duhet të rikthejë vëmendjen te edukimi dhe përgjegjësia kolektive.
Në të njëjtën linjë, trajneri i Barcelonës, Hansi Flick, dënoi ashpër çdo formë racizmi, duke e cilësuar incidentin si zhgënjyes dhe të papranueshëm. Ai theksoi se raste të tilla vijnë nga një pakicë që nuk përfaqëson vlerat e sportit.
“Racizmi nuk ka vend as në stadiume dhe as në jetën e përditshme. Futbolli duhet të jetë një hapësirë për të gjithë, pa dallim”, u shpreh Flick.
Deklaratat e dy trajnerëve vijnë në një moment kur futbolli ndërkombëtar përballet vazhdimisht me incidente të ngjashme, duke shtuar presionin mbi institucionet sportive dhe shoqërinë për të ndërmarrë hapa konkretë kundër diskriminimit.
Mesazhi i tyre ishte i qartë: lufta kundër racizmit nuk është vetëm detyrë e sportit, por një përgjegjësi e përbashkët që kërkon reflektim dhe ndryshim të mentalitetit në të gjitha nivelet e shoqërisë, transmeton rtk, përcjell helveticALForum.ch
