Nga Dahest LUMA, Budapest
Budapest, 25 mars 2026 – Dje, pasdite në Budapest u zhvillua një takim i rëndësishëm ndërmjet përfaqësuesve të Institutit Shkencor Helvetik të Evropës Juglindore, me seli në Zvicër, dhe filantropit, njëherësh Konsull Nderi i Shqipërisë në Hungari, z. Avni Hafuzi, një personalitet i njohur në mbarë kombin tonë. Në këtë takim morën pjesë Presidenti i Institutit, Dr.sci. Dashnim Hebibi, dhe kryesuesi i bordit, Rafet Ademi, të cilët u pritën në një atmosferë të ngrohtë, miqësore dhe me respekt të ndërsjellë.
Ky takim u cilësua si një hap i rëndësishëm drejt forcimit të bashkëpunimit institucional në diasporë, duke vënë në qendër projekte që kanë karakter kombëtar, kulturor dhe shkencor. Diskutimet u fokusuan në identifikimin e fushave konkrete ku mund të ndërtohen iniciativa të përbashkëta, me qëllim krijimin e një rrjeti të qëndrueshëm bashkëpunimi mes institucioneve dhe personaliteteve shqiptare në Evropë. Z. Avni Hafuzi u vlerësua për rolin e tij të spikatur në diasporën shqiptare në Hungari dhe më gjerë, si një figurë që ka ndihmuar në ndërtimin e urave të komunikimit me institucionet shtetërore hungareze, duke e përfaqësuar denjësisht çështjen shqiptare. Kontributi i tij shumëvjeçar, angazhimi filantropik dhe përkushtimi ndaj interesave kombëtare janë konsideruar si elemente kyçe që e bëjnë atë një partner të rëndësishëm në projekte me ndikim të gjerë.
Nga ana tjetër, Instituti Shkencor Helvetik i Evropës Juglindore riafirmoi misionin e tij për të mbështetur zhvillimin e dijes, kërkimit shkencor dhe nismave që kontribuojnë në avancimin e shoqërisë shqiptare në diasporë. Në këtë kuadër, bashkëpunimi me z. Hafuzi shihet si një mundësi për të konkretizuar projekte që lidhen me edukimin, kulturën, trashëgiminë dhe promovimin e vlerave shqiptare në nivel ndërkombëtar.
Takimi u zhvillua në një frymë bashkëbisedimi të hapur dhe konstruktiv, ku u shkëmbyen ide dhe vizione për të ardhmen. Pjesëmarrësit theksuan rëndësinë e bashkëpunimit të vazhdueshëm dhe të koordinuar, si një domosdoshmëri për të arritur rezultate konkrete dhe të qëndrueshme në shërbim të komunitetit shqiptar.
Filantropi Avni Hafuzi, Konsull Nderi i Shqipërisë, i mirëpriti dhe i nderoi me respekt miqtë e tij të ardhur nga Zvicra
Atmosfera e takimit reflektoi gjithashtu elemente të traditës shqiptare të mikpritjes dhe bashkimit, ku diskutimet nuk mbetën vetëm në nivel formal, por u shoqëruan me një ndjenjë të fortë lidhjeje shpirtërore dhe përgjegjësie ndaj çështjes kombëtare. Në këtë kontekst, u theksua se ruajtja e identitetit dhe kultivimi i vlerave shqiptare në diasporë mbeten prioritete të përbashkëta. Në përfundim të takimit, palët u dakorduan që të vijojnë komunikimin dhe të punojnë në konkretizimin e ideve të diskutuara. Në të ardhmen e afërt do të bëhen të ditur hapat konkret të këtij bashkëpunimi, përfshirë projektet dhe iniciativat që pritet të ndërmerren, të cilat do të kontribuojnë në forcimin e mëtejshëm të rolit të diasporës shqiptare dhe në promovimin e interesave kombëtare në një kontekst më të gjerë ndërkombëtar.
Budapest, ura e bashkëpunimit shqiptar
Në zemër të Budapestit, mes dritave që pasqyrohen mbi Danub dhe urave që lidhin histori, u krijua një odë shqiptare. Nuk ishte një odë e zakonshme. Ishte një vend ku fjala kishte peshë, mikpritja ishte e sinqertë dhe zemrat rrehin për atdheun.
Takimi mes z. Avni Hafuzi, filantrop dhe Konsull Nderi i Shqipërisë, dhe përfaqësuesve të Institutit Shkencor Helvetik të Evropës Juglindore, Dr. sci.Dashnim Hebibi dhe Rafet Ademi, ishte më shumë se një takim institucional. Ishte një moment bashkëpunimi, një rikthim te tradita, një dëshmi se edhe larg vendlindjes, identiteti shqiptar mbetet gjallë.
Dhuratat e simbolike, bisedat e thella dhe fryma vëllazërore krijuan urën e radhës të një bashkëpunimi që do të shtrihet mbi projekte kombëtare dhe kulturore. Drita e zemrave që ndezën atë mbrëmje nuk shuhet nga largësia dhe nuk zbehet nga koha. Së shpejti do të bëhen të ditura hapat konkretë të bashkëpunimit. Çdo iniciativë e re do të jetë një gur i ri në urën që lidh shqiptarët kudo në botë. Odët shqiptare jetojnë. Identiteti shqiptar rritet. Dhe ëndrra kombëtare vazhdon, e fuqishme dhe e pandalshme.
