Kreu i Kishës Katolike, Papa Leo, ka dënuar ashpër dhunën dhe shkatërrimin e shkaktuar nga lufta në Lindjen e Mesme, duke e cilësuar atë si “një skandal për të gjithë familjen njerëzore”. Gjatë fjalës së tij në lutjen tradicionale Angelus në Sheshin e Shën Pjetrit, ai bëri thirrje urgjente për një ndërprerje të menjëhershme të armiqësive.
Ndërsa konflikti mes SHBA-së, Izraelit dhe Iranit ka hyrë në javën e katërt, Papa shprehu shqetësimin e tij të thellë për përshkallëzimin e situatës, jo vetëm në Lindjen e Mesme, por edhe në rajone të tjera të prekura nga dhuna dhe paqëndrueshmëria.
“Nuk mund të heshtim përballë vuajtjeve të kaq shumë njerëzve, viktimave të pafuqishme të këtyre konflikteve. Ajo që i lëndon ata, lëndon të gjithë njerëzimin,” deklaroi ai para mijëra besimtarëve të mbledhur në Vatikan.
Papa Leo theksoi se komuniteti ndërkombëtar ka një përgjegjësi morale për të vepruar dhe për të ndalur gjakderdhjen, duke paralajmëruar se vazhdimi i luftës vetëm sa do të thellojë krizën humanitare dhe do të rrisë vuajtjet e civilëve.
Në përfundim të mesazhit të tij, ai u bëri thirrje besimtarëve në mbarë botën që të bashkohen në lutje dhe solidaritet, me shpresën se dialogu dhe mirëkuptimi do të hapin rrugën drejt një paqeje të qëndrueshme, transmeton rtk.
