Zvicra ka eksportuar gjatë vitit 2025 materiale ushtarake me vlerë pothuajse 950 milionë franga zvicerane, duke shënuar një rritje prej rreth 43 për qind krahasuar me vitin 2024. Kjo u bë e ditur nga Sekretariati Shtetëror për Çështjet Ekonomike (SECO), i cili publikoi statistikat më të fundit mbi eksportet e industrisë së armatimit të vendit. Sipas raportit, Gjermania ishte blerësi kryesor i armëve dhe materialeve ushtarake nga Zvicra. Vetëm në këtë shtet u eksportuan produkte me vlerë 386.4 milionë franga. Pas saj vijnë Shtetet e Bashkuara të Amerikës me 94.2 milionë franga, Hungaria me 63.4 milionë, Italia me 62.2 milionë dhe Luksemburgu me 47.4 milionë franga.
Çfarë eksportoi Zvicra
Pjesa më e madhe e eksporteve përbëhej nga municion dhe predha, të cilat kryesisht u dërguan në Gjermani. Vetëm për këtë kategori eksportet arritën në 215 milionë franga. Po ashtu, një pjesë e konsiderueshme e eksporteve ishin automjete të blinduara dhe pjesë të tyre, me një vlerë rreth 214 milionë franga, sërish kryesisht për tregun gjerman, transmeton 20min.ch. Ndërkohë, pjesë për avionë luftarakë me vlerë rreth 40 milionë franga u eksportuan drejt Shteteve të Bashkuara.
Numri i kërkesave për eksport
Gjatë vitit 2025 u paraqitën rreth 2000 kërkesa për eksport të materialeve ushtarake, pothuajse i njëjti numër si në vitin 2024. Pas fillimit të Pushtimit rus të Ukrainës, eksportet zvicerane të armëve kishin rënë me rreth një të tretën. Tani ato janë rikthyer pothuajse në nivelet para luftës.
Debat politik në Zvicër
Tema e eksporteve të armëve vazhdon të shkaktojë debat të fortë politik në Zvicër. Partitë e krahut të djathtë kërkojnë lehtësimin e rregullave për eksportin e armëve për të mbështetur industrinë e mbrojtjes. Nga ana tjetër, partitë e majta shprehen kundër, duke kërkuar kontroll më të rreptë dhe kufizime më të forta. Debati është bërë edhe më i ndjeshëm kohët e fundit, pasi Këshilli Federal i Zvicrës duhet të vendosë nëse eksportet e armëve drejt SHBA-së mund të vazhdojnë në rast se ky vend përfshihet në një konflikt të armatosur me Iranin.
Një pjesë shumë e vogël e ekonomisë
Megjithatë, edhe pse shifrat janë të mëdha në vlerë absolute, eksportet e armëve përbëjnë vetëm 0.21 për qind të totalit të eksporteve të ekonomisë zvicerane, duke mbetur një sektor relativisht i vogël në krahasim me industrinë e përgjithshme të eksportit të vendit, transmeton 20min.ch, përcjell helveticALForum.ch
