Nga data 4 deri më 15 prill, Tirana do të shndërrohet në qendrën e takimit të shqiptarëve nga e gjithë bota, duke mirëpritur Samitin e 4-t të Diasporës Shqiptare. Ky aktivitet i rëndësishëm kombëtar organizohet nën kujdesin e veçantë të Kryeministrit të Shqipërisë, Edi Rama, në bashkëpunim me Ministrinë për Evropën dhe Punët e Jashtme dhe Agjencinë Kombëtare të Diasporës.
Samiti synon të forcojë lidhjet mes Shqipërisë dhe komuniteteve shqiptare që jetojnë jashtë vendit, duke krijuar një platformë bashkëpunimi për zhvillimin ekonomik, kulturor dhe shoqëror të kombit shqiptar. Përmes këtij aktiviteti, diaspora shihet jo vetëm si një pjesë e rëndësishme e identitetit kombëtar, por edhe si një faktor aktiv në ndërtimin e së ardhmes së vendit.
Këtë vit, samiti zhvillohet nën moton “HEART – Zemra”, e cila simbolizon lidhjen shpirtërore të diasporës me atdheun. Programi i samitit do të përqendrohet në pesë shtylla kryesore: Heritage (Trashëgimia), Economy (Ekonomia), Alliances (Aleancat), Reputation (Reputacioni) dhe Twinning (Binjakëzimi). Këto fusha synojnë të krijojnë ura të reja bashkëpunimi mes shqiptarëve kudo që jetojnë, duke promovuar identitetin, kulturën dhe potencialin ekonomik të vendit.
Përmes diskutimeve, paneleve dhe aktiviteteve të ndryshme, pjesëmarrësit do të kenë mundësi të ndajnë përvoja, ide dhe projekte që kontribuojnë në zhvillimin e Shqipërisë dhe në forcimin e rolit të diasporës në arenën ndërkombëtare.
Samiti i Diasporës pritet të mbledhë personalitete të njohura shqiptare nga fusha të ndryshme si biznesi, akademia, kultura dhe politika. Ky takim konsiderohet një moment i rëndësishëm për të thelluar bashkëpunimin mes institucioneve shqiptare dhe komuniteteve shqiptare në botë.
Me zemrën te Shqipëria, diaspora vazhdon të mbetet një urë e fuqishme lidhëse mes vendit dhe botës, duke kontribuar në zhvillimin, identitetin dhe reputacionin e kombit shqiptar, transmeton helveticALForum.ch
