Më 8 mars, qytetarët zviceranë do të votojnë për katër iniciativa federale, mes tyre edhe Iniciativa për Fondin Klimatik, e propozuar nga Partia Socialdemokrate (SP) dhe të Gjelbrit. Qëllimi i saj është që Konfederata të investojë çdo vit nga 0.5 deri në 1 për qind të Prodhimit të Brendshëm Bruto (PBB) për mbrojtjen e klimës – rreth 4 deri në 8 miliardë franga në vit, transmeton 20min.ch, përcjell helveticALforum.ch. Sipas nismëtarëve, fondi do të financohet pa taksa të reja, pa shkurtime buxhetore dhe do të përjashtohet nga frena e borxhit. Mjetet do të përdoren për projekte shtetërore, por edhe për mbështetje financiare të kantoneve, komunave dhe aktorëve privatë. Përveç subvencioneve direkte, parashikohen edhe kredi të favorshme, garanci dhe sigurime financiare.
Argumentet e përkrahësve
Iniciativa mbështetet nga SP, të Gjelbrit, EVP, sindikatat, të rinjtë e GLP-së, si dhe nga disa profesorë të ETH Cyrih dhe EPFL Lozanë. Ata theksojnë se fondi është i domosdoshëm për të arritur objektivin e miratuar tashmë nga populli: emetime neto zero deri në vitin 2050.
Sipas një paralajmërimi të bërë nga Komiteti i Iniciativës, mosveprimi ndaj ndryshimeve klimatike mund t’i kushtojë Zvicrës deri në 34 miliardë franga në vit deri në 2060. Kryetarja e të Gjelbërve, Lisa Mazzone, e përshkruan iniciativën si një “situatë fitore–fitore–fitore”, që njëkohësisht mbron klimën, përmirëson cilësinë e jetës dhe krijon perspektiva ekonomike.
Kundërshtimet e palës kundër
Partitë borgjeze – Qendra, FDP dhe SVP – si dhe organizata ekonomike Economiesuisse, e kundërshtojnë fuqishëm iniciativën. Kritika kryesore lidhet me financimin: sipas tyre, kostoja mund të arrijë deri në 3000 franga për familje në vit.
Kundërshtarët e quajnë nismën “Iniciativa e Fondit të Borxhit Klimatik”, duke paralajmëruar borxhe të reja deri në 10 miliardë franga në vit, rritje taksash dhe shkurtime në fusha kyçe si arsimi dhe siguria. Ata shtojnë se Zvicra tashmë investon mbi 3 miliardë franga në vit për mbrojtjen e klimës, dhe se subvencionet shtesë mund të jenë joefikase dhe të shtrembërojnë tregun.
Qëndrimi i Këshillit Federal
Edhe Këshilli Federal, me ministrin e Mjedisit Albert Rösti (SVP), rekomandon votimin kundër iniciativës. Sipas qeverisë, Zvicra tashmë disponon mjete të konsiderueshme për klimën, energjinë dhe biodiversitetin, ndërsa iniciativa sjell rrezik për borxhe të reja dhe presion financiar mbi familjet dhe bizneset, transmeton 20min.ch, përcjell helveticALforum.ch
