Shefi i Konsullatës së Përgjithshme të Kosovës në Cyrih, Vigan Berisha, ka marrë pjesë në hapjen e ekspozitës së artistes zvicerane Caro Bühler, me titull “Njeriu në qendër”, organizuar nga Klubi i Grave Amerikane të Cyrihut. Ekspozita sjell para publikut vepra artistike që eksplorojnë dimensionet fizike, emocionale dhe psikologjike të njeriut dhe do të jetë e hapur deri më 17 dhjetor 2026.
CYRIH, 09 tetor 2026 – Shefi i Konsullatës së Përgjithshme të Republikës së Kosovës në Cyrih, Vigan Berisha, ka marrë pjesë në një ngjarje kulturore në qytetin zviceran, ku u hap ekspozita e artistes Caro Bühler, me titull “Njeriu në qendër”. Siç mëson helveticALforum.ch, ekspozita është organizuar nga Klubi i Grave Amerikane të Cyrihut (American Women’s Club of Zurich) dhe sjell para publikut një koleksion veprash që trajtojnë njeriun, përvojat e tij jetësore dhe botën e brendshme emocionale. Pjesëmarrjen në këtë aktivitet kulturor, Vigan Berisha e ka përshkruar përmes një mesazhi, në të cilin ka vlerësuar krijimtarinë e artistes zvicerane dhe rëndësinë e shkëmbimit kulturor në një mjedis ndërkombëtar.
Vigan Berisha: “Njeriu në qendër”, një ekspozitë që sjell në pah botën e brendshme të individit
Në vijim, helveticALforum.ch publikon të plotë përshkrimin e shefit të Konsullatës së Përgjithshme të Kosovës në Cyrih, Vigan Berisha, lidhur me këtë ngjarje kulturore:
Kishim kënaqësinë të marrim pjesë në hapjen e ekspozitës së artistes zvicerane Caro Bühler, me titull “Njeriu në qendër”, organizuar nga Klubi i Grave Amerikane të Cyrihut (American Women’s Club of Zurich).
Përmes pikturave të saj në vaj dhe akril, znj. Bühler, trajton njeriun në kompleksitetin e tij fizik, emocional dhe psikologjik. Duke u mbështetur edhe në përvojën e saj profesionale në fushën e shëndetësisë, ajo shkon përtej paraqitjes së trupit, duke sjellë në pah botën e brendshme të individit, ëndrrat, dëshirat, ndjeshmërinë dhe përvojat jetësore.
Me një stil të veçantë, veprat e saj ndërthurin atë që është e dukshme me emocionet dhe historitë që fshihen nën sipërfaqe, duke e ftuar shikuesin të reflektojë mbi përvojën njerëzore.
Hapja e kësaj ekspozite në Cyrih, krijoi një mundësi për të vlerësuar shprehjen artistike bashkëkohore dhe për të nxitur shkëmbimin kulturor në një mjedis ndërkombëtar.
Ekspozita do të jetë e hapur deri më 17 dhjetor 2026, kur do të mbahet aktiviteti përmbyllës.
Arti si urë lidhëse ndërmjet kulturave
Ekspozita “Njeriu në qendër” e vendos përvojën njerëzore në fokus të shprehjes artistike, duke i dhënë hapësirë reflektimit mbi emocionet, ndjeshmërinë dhe historitë personale që qëndrojnë pas asaj që shihet në sipërfaqe. Pjesëmarrja e përfaqësuesve diplomatikë në aktivitete të tilla kulturore krijon mundësi për njohjen e krijimtarisë bashkëkohore dhe për forcimin e lidhjeve kulturore në shoqërinë zvicerane. Hapja e ekspozitës në Cyrih dëshmon gjithashtu rëndësinë e aktiviteteve artistike si hapësira takimi për njerëz me prejardhje dhe përvoja të ndryshme, të bashkuar përmes artit dhe interesit për kulturën. Ekspozita e artistes Caro Bühler do të vazhdojë të jetë e hapur për publikun deri më 17 dhjetor 2026, kur është planifikuar edhe aktiviteti përmbyllës, përcjell helveticALforum.ch.
