Agjencitë e OKB-së i kanë bërë thirrje Uashingtonit që të vazhdojë të lejojë hyrjen e azilkërkuesve dhe të garantojë një proces të rregullt ligjor, pas zotimit të Presidentit Donald Trump për të ngrirë migracionin nga vendet e “Botës së Tretë”. Deklaratat e Trump erdhën pas një sulmi pranë Shtëpisë së Bardhë, që hetuesit thonë se u krye nga një shtetas afgan që kishte hyrë në SHBA në vitin 2021.
Zëdhënësi i Zyrës së OKB-së për të Drejtat e Njeriut, Jeremy Laurence, tha në një konferencë për shtyp në Gjenevë se azilkërkuesit kanë të drejtë për mbrojtje sipas ligjit ndërkombëtar. “Ata kanë të drejtë për mbrojtje dhe kjo duhet të trajtohet me proces të rregullt ligjor,” u shpreh ai.
Edhe zëdhënësja e Agjencisë së OKB-së për Refugjatët, Eujin Byun, përsëriti të njëjtin apel. Ajo theksoi se personat që mbërrijnë në një vend duke kërkuar mbrojtje duhet të kenë qasje në territor dhe mundësi për të aplikuar për azil sipas ligjit.
“Shumica dërrmuese e refugjatëve janë anëtarë të komuniteteve pritëse që zbatojnë ligjin,” tha Byun, duke u bërë thirrje shteteve të garantojnë të drejtat e refugjatëve dhe azilkërkuesve në këtë periudhë tensioni politik, transmeton euronewsal.
