Nga 10 dhjetori, kompanitë e mediave sociale në Australi do të duhet të ndërmarrin “hapa të arsyeshëm” për të siguruar që fëmijët nën 16 vjeç të mos mund të krijojnë llogari në platformat e tyre, ndërsa llogaritë ekzistuese të çaktivizohen ose hiqen.
Qeveria australiane e cilëson këtë ndalim, i pari në botë, si një masë për të zvogëluar “presionet dhe rreziqet” që fëmijët përjetojnë në rrjete sociale. Sipas saj, veçoritë e dizajnit i nxisin të kalojnë më shumë kohë para ekranit, duke i ekspozuar ndaj përmbajtjeve që mund të dëmtojnë shëndetin dhe mirëqenien.
Një studim i porositur nga qeveria tregoi se 96% e fëmijëve të moshës 10–15 vjeç përdorin rrjete sociale, ndërsa 7 nga 10 janë ekspozuar ndaj përmbajtjeve të dëmshme, nga materiale mizogjene e video dhune, deri te përmbajtje që promovojnë çrregullime të të ngrënit dhe vetëvrasjen.
Cilat platforma përfshihen?
Qeveria ka emëruar dhjetë platforma që do të përfshihen në ndalim: Facebook, Instagram, Snapchat, Threads, TikTok, X, YouTube, Reddit, Kick dhe Twitch.
Ndërkohë, platformat e lojërave si Roblox dhe Discord kanë prezantuar kontrolle të moshës për disa veçori, në përpjekje për të shmangur përfshirjen në listë. Qeveria ka paralajmëruar se lista do të rishikohet vazhdimisht, duke u bazuar në tre kritere: nëse platforma ka si qëllim kryesor ndërveprimin social online, nëse lejon ndërveprim mes përdoruesve, dhe nëse u mundëson atyre të postojnë materiale.
Si do të zbatohet ndalimi?
Fëmijët dhe prindërit nuk do të ndëshkohen për shkeljen e ndalimit. Përgjegjësia bie mbi kompanitë e mediave sociale, të cilat rrezikojnë gjoba deri në 49.5 milionë dollarë për shkelje serioze ose të përsëritura.
Qeveria kërkon përdorimin e teknologjive të sigurimit të moshës, si: verifikimi me ID qeveritare, njohja e fytyrës ose zërit, analiza e sjelljes online për të përcaktuar moshën.
Platformat nuk mund të mbështeten vetëm te deklarimi i moshës nga përdoruesit apo garancia e prindërve.
Meta (Facebook, Instagram, Threads) ka njoftuar se nga 4 dhjetori do të nisë mbylljen e llogarive të adoleshentëve. Ata që preken gabimisht mund të verifikojnë moshën me ID qeveritare ose video selfie. Platformat e tjera nuk kanë dhënë ende detaje mbi mënyrën e zbatimit, transmeton rtsh.
