Përgatiti Dashnim HEBIBI
Një mbrëmje mirënjohjeje, kulture dhe bashkimi në Winterthur
Të premten, më 24 tetor, në qytetin e Winterthur-it, ansambli i njohur “Trojet” zhvilloi një takim të ngrohtë me anëtarët e tij, ku u ndanë mirënjohje dhe falënderime për të gjithë ata që kontribuojnë në ruajtjen e traditës, kulturës dhe identitetit kombëtar shqiptar në mërgatë.
Në këtë mbrëmje të veçantë, në mesin e shumë të ftuarve e dashamirëve të kulturës, u nderua edhe kryetari i LAPSH-it për Cyrih, z. Naser Ulaj, për mbështetjen e vazhdueshme ndaj aktiviteteve kulturore dhe edukative të komunitetit shqiptar në Zvicër.
Një ansambël që punon me shpirt, jo për pagesë
Në fjalën përshëndetëse, drejtuesit e ansamblit “Trojet” theksuan se asnjë nga anëtarët nuk përfiton pagë për punën që bën, por të gjithë kontribuojnë me shpirt e përkushtim, duke ia kushtuar kohën dhe energjinë e tyre gjeneratave të reja.
Presidenti i ansamblit, z. Zeqë Gashi, njihet për pozitivitetin, përkushtimin dhe ndershmërinë e tij. Ai vlerëson meritokracinë, punën dhe dashurinë për kulturën shqiptare. Së bashku me familjen e tij, është bërë një shtyllë e fortë e ansamblit, duke ruajtur miqësi dhe respekt të ndërsjellë me gjithë kryesinë dhe prindërit që kanë fëmijët pjesë të “Trojeve”.
Një mbrëmje dashamirësie dhe bashkimi
Mbrëmja u zhvillua në atmosferë festive e miqësore, ku u ndanë disa mirënjohje simbolike për kontributet e veçanta të anëtarëve dhe bashkëpunëtorëve.
Ndër ta, u veçua z. Naser Ulaj, i cili u vlerësua për mbështetjen e tij të vazhdueshme ndaj aktiviteteve kulturore dhe për rolin e tij aktiv në forcimin e bashkëpunimit mes LAPSH-it dhe organizatave kulturore shqiptare në Zvicër.
Në një prononcim për sam24.info, z. Ulaj u shpreh:
“Jemi të nderuar për këtë vlerësim. Ansambli ‘Trojet’ po bën një punë të madhe për ruajtjen e gjuhës dhe traditës sonë kombëtare. Ne duhet të punojmë edhe më shumë për të forcuar LAPSH-in dhe për ta bërë mërgatën shqiptare edhe më të bashkuar për të mirën e përbashkët.”
Kultura si ura që bashkon shqiptarët
Ky aktivitet dëshmoi edhe njëherë se kultura dhe arti janë ura të forta që bashkojnë shqiptarët kudo që jetojnë.
Ansambli “Trojet”, me aktivitetet e tij të pandërprera, po luan një rol të rëndësishëm në ruajtjen e identitetit, edukimin kombëtar të fëmijëve dhe afrimin e brezave të rinj me traditën.
Në fund të mbrëmjes, të gjithë pjesëmarrësit ndanë momente të gëzueshme dhe ndjenja mirënjohjeje për punën që bëhet me dashuri e përkushtim në shërbim të komunitetit./SAM24.info