Nga Dashnim HEBIBI, Shkup
Mërgata shqiptare me shpirt nga Kumanova, Tetova, Shkupi, Kërçova, Struga…: “Votoni drejt, mos e ndani fuqinë kombëtare!“, është mesazhi i mërgimtarëve nga Maqedonia e Veriut që jetojnë e veprojnë në Zvicër dhe në gjithë evropën e deri në SHBA.
19 tetor 2025 – Qytetarët e Maqedonisë së Veriut sot po i drejtohen kutive të votimit për zgjedhjet e teta lokale, një proces që tejkalon rëndësinë e zakonshme komunale. Këto zgjedhje po mbahen në një klimë të nxehtë politike, ku përveç garës për pushtetin lokal, në qendër të vëmendjes janë temat e përfaqësimit, identitetit dhe drejtimit të ardhshëm të shqiptarëve në këtë shtet.
Sipas Komisionit Shtetëror të Zgjedhjeve, të drejtë vote kanë 1.832.415 qytetarë, prej të cilëve 1.717.803 brenda vendit dhe mbi 112 mijë të regjistruar jashtë shtetit, ndonëse këtë vit mërgata nuk ka mundësi të shprehë votën e saj. Në gjithë vendin janë hapur 3.474 qendra votimi, ndërsa vetëm në Qytetin e Shkupit janë regjistruar 474.304 votues.
Në garë janë 309 kandidatë për kryetarë komunash, 576 lista këshilltarësh dhe mbi 10.490 kandidatë nga 22 parti, 19 koalicione dhe 119 kandidatura të pavarura.
Një ditë e rëndësishme për shqiptarët dhe për shtetin
Këto zgjedhje janë më shumë se një rotacion i zakonshëm i pushtetit lokal. Ato janë një provë për pjekurinë politike dhe për unitetin e shqiptarëve, në një moment kur fushata ka treguar ndarje, rivalitete dhe mungesë bashkërendimi në shumë komuna.
Për mërgatën shqiptare, e cila gjithmonë ka qenë mbështetje e madhe për zhvillimet në vendlindje, ky proces shihet si një moment vendimtar. Edhe pse këtë herë pjesëmarrja e diasporës ka qenë e ulët, interesimi shpirtëror dhe vëmendja e tyre ndaj rezultateve është e madhe. Mërgata pret që vota shqiptare të orientohet drejt së mirës së përbashkët dhe të mos shpërndahet në shumë drejtime, sepse çdo votë e humbur është një mundësi e humbur për përfaqësim të denjë.
Dy realitete që përplasen në fushatë
Analistët vërejnë se fushata e këtij viti ka qenë një nga më të ngarkuarat dhe më të çuditshmet në historinë e zgjedhjeve lokale. Në vend të temave komunale – si zhvillimi urban, pastrimi, arsimi apo infrastruktura – ajo është dominuar nga tema shtetërore e kombëtare.
Nga njëra anë, disa parti maqedonase kanë ringjallur retorika nacionaliste, duke synuar të forcojnë identitetin etnik dhe të marrin vota edhe në zona me shumicë shqiptare. Nga ana tjetër, brenda kampit shqiptar ka pasur përplasje mes koalicioneve që kërkojnë të mbajnë ose të fitojnë terren politik, shpesh duke lënë në hije thelbin e këtyre zgjedhjeve – shërbimin ndaj qytetarit dhe menaxhimin lokal.
Mërgata bën thirrje për unitet: “Mos e humbni votën shqiptare!”
Në shumë qendra shqiptare të diasporës, thirrja që përsëritet është e qartë: të mos lejojmë që vota shqiptare të ndahet dhe të humbasë peshën e saj.
Ka një vetëdije të gjerë se çdo komunë e humbur është një hap pas në përfaqësimin politik dhe kulturor të shqiptarëve në Maqedoninë e Veriut.
Mërgata kërkon që qytetarët të votojnë me përgjegjësi, të mos ndikohen nga emocionet apo premtimet boshe, por të shikojnë interesin e përgjithshëm të komunitetit.
“Vetëm të bashkuar mund të jemi faktor politik dhe ekonomik, vetëm të bashkuar mund të mbrojmë të drejtat tona dhe të ecim përpara në rrugën e integrimit evropian”, thuhet në mesazhet që qarkullojnë në rrjetet e diasporës shqiptare.
Frika nga përçarja dhe pasojat politike
Në shumë komuna shqiptare, gara është e fortë dhe shpesh me më shumë se një kandidat shqiptar. Kjo ndarje e votës rrezikon të sjellë rezultate të padëshiruara, madje edhe humbje të komunave ku shqiptarët janë shumicë.
Nëse kjo ndodh, pasojat mund të jenë të gjata – jo vetëm në pushtetin lokal, por edhe në balancat e përfaqësimit politik në nivel shtetëror.
Analistët paralajmërojnë se komunat si Tetova, Çairi, Gostivari, Kërçova dhe Struga do të jenë vendimtare për forcën e shqiptarëve në politikën e brendshme. Fitoret ose humbjet në këto qytete do të përcaktojnë se kush do të ketë zërin më të fortë në institucionet e ardhshme.
Një apel për fund: Të votojmë me mençuri dhe me zemër për të ardhmen tonë
Në këtë ditë zgjedhjesh, apeli i përgjithshëm është për bashkim, përgjegjësi dhe mençuri kombëtare.
Kjo nuk është vetëm një garë mes partive, por një provë e ndërgjegjes sonë kolektive – a dimë të bashkohemi për të mirën e përbashkët, apo do të lejojmë që ndarjet e brendshme të na dobësojnë?
Mërgata dhe qytetarët brenda vendit kanë të njëjtën dëshirë: të shohin shqiptarët të fortë, të bashkuar dhe me drejtim të qartë përpara.
Le të votojmë me bindjen se çdo votë është një gur në ndërtimin e së ardhmes sonë të përbashkët.
Sepse sot, dielli i vërtetë do të rrezatojë vetëm në ato komuna ku vota do të shkojë drejt – për unitet, dinjitet dhe zhvillim. Urime na qoftë kjo ditë e madhe historike! / SAM24.info