Nga Dashnim HEBIBI, LUZERN
Mërgata shqiptare e bashkuar për Kombëtaren Kuq e Zi — zemra në stadium, edhe pse larg
Edhe pse këtë herë nuk mund të jenë fizikisht në stadium, mërgata shqiptare anembanë botës po e përjeton me emocione të fuqishme ndeshjen e madhe mes Shqipërisë dhe Serbisë. Ndjenja e mungesës në tribuna është e thellë, sepse mërgimtarëve gjithmonë u ka rrahur zemra kuqezi, por sot ajo rreh nga distanca — me të njëjtin pasion, me të njëjtin besim e dashuri për flamurin.
Në shumë shtete evropiane e përtej oqeanit, shqiptarët po bashkohen nëpër lokale, shtëpi e shoqata për të ndjekur ndeshjen në ekrane gjigante. Nga Zvicra në Gjermani, nga Suedia në Shtetet e Bashkuara, çdo cep ku jeton një shqiptar është kthyer në një “mini-stadium” ku ndjehet era e atdheut dhe kenga e zemrës:
“Kuqezi, jemi gati për fitore!”
Nga Kërçova, Florim Useini, një atdhetar i njohur që jeton e vepron në Luzern të Zvicrës, rrëfen për sam24.info emocionet e mbrëmjes së sotme. Ai ka organizuar bashkë me bashkatdhetarët një mbledhje të madhe në një lokal shqiptar të Naim Medvegjës, ku do të ndiqet ndeshja në një ekran të madh.
“Kësaj here nuk kemi mundësi të jemi në stadium, edhe pse është afër Prishtinës e vetëm pak kilometra nga Medvegja jonë. Por ne jemi aty me zemër, nga Zvicra. Besojmë se djemtë tanë do të luajnë me shpirt dhe do ta mundin Serbinë. Kombëtarja na bashkon të gjithëve — dhe sonte do ta kalojmë një mbrëmje të paharruar,” – thotë Florimi.
Në atë mbrëmje të veçantë do të marrin pjesë shumë miq të mirë, patriotë e veprimtarë nga të gjitha trevat shqiptare. Bashkimi i tyre përreth një ekrani, për një qëllim të përbashkët, dëshmon fuqinë e lidhjes që shqiptarët kanë me kombin e tyre, pavarësisht largësisë gjeografike.
Megjithatë, mërgata nuk e fsheh pakënaqësinë dhe shqetësimin për disa zhvillime të papranueshme: mungesën e flamurit kombëtar në stadium dhe provokimet e njohura nga pala serbe.
“Kjo duhet dënuar. Është e papranueshme që në një ndeshje ku luhet futboll, dikush të mundohet të provokojë dhe të fyejë simbolet tona,” – shprehen mërgimtarët, të cilët kërkojnë reagim të drejtë dhe të ashpër ndaj këtyre veprimeve.
Por mbi gjithçka, sonte mbizotëron shpresa, krenaria dhe dashuria për Kombëtaren Kuq e Zi. Në çdo zemër shqiptare, pavarësisht nëse ndodhet në Tiranë, Prishtinë, Medvegjë apo Luzern, ndjehet i njëjti emocion.
Të gjithë presin me padurim rezultatin pozitiv — fitoren që do të ndezë festën në çdo lokal e çdo familje shqiptare kudo në botë.
Sepse kudo që janë, shqiptarët janë një: një komb, një zemër, një flamur. /SAM24.info