Drejtori i Përgjithshëm i Policisë së Kosovës, Gazmend Hoxha, ka thënë se është në kontakt me KFOR lidhur me rastet e fluturimeve të dronëve në pjesën veriore të vendit ditët e fundit, që dyshohet se kanë ardhur nga territori i Serbisë.
Hoxha theksoi se KFOR është përgjegjës për hapësirën ajrore, dhe së bashku po kryejnë monitorimin e situatës. Sipas tij, rreziku ekziston për pjesën kufitare, por jo për qytetarët.
“Kohën e fundit kemi pasur fluturime të dronëve që ne po dyshojmë se po vijnë nga territori i Serbisë në pjesën veriore të Kosovës. Policia është në kontakt me KFOR-in, jemi duke bërë monitorimin dhe për të parë se çfarë mund të bëhet. Është e rrezikshme për pjesën e kufirit po, por për qytetarët tanë jo. Ne jemi duke i mbrojtur. Ndërsa hapësira ajrore është përgjegjësi e KFOR-it. Ne e kemi njoftuar KFOR-in dhe partnerët tanë, janë duke punuar për këtë drejtim”, tha Hoxha.
Shkeljen e hapësirës ajrore të Kosovës nga dronët që dyshohet se vijnë nga Serbia, disa ditë më parë e konfirmoi edhe ministri i Brendshëm në detyrë, Xhelal Sveçla, transmeton rtsh.