Nga Agim Paçarizi, Zvicër
Sot, në Meyrin të Gjenevës, në orën 11:00, në Kopshtin e të Zhdukurve, u hap ekspozita e artistit Artan Korenica, në shenjë nderimi dhe kujtimi për të gjithë personat e zhdukur gjatë luftës në Kosovë.
Në këtë aktivitet morën pjesë shumë qytetarë, përfaqësues të institucioneve të Republikës së Kosovës, ambasadori i Republikës së Kosovës në Bernë, z. Mentor Latifi, Konsullja e Përgjithshme e Kosovës në Gjenevë, znj. Filloreta Kabashi, zyrtarët për personat e pagjetur Kushtrim Gara dhe Agron Limani, si dhe shumë aktivistë e përfaqësues të shoqatave shqiptare.
Aktiviteti u organizua nga Konsullata e Republikës së Kosovës në Gjenevë dhe Shoqata “Kopshti i të Zhdukurve” në Meyrin, me mbështetjen e Shoqatës “Komuniteti Shqiptar në Gjenevë”.
Por dita nuk mbaron këtu.
Në orën 18:00 do të mbahet një tryezë e rrumbullakët, ku do të diskutohet për çështjen e të zhdukurve dhe përgjegjësinë për zbardhjen e fatit të tyre.
Ndërsa në orën 20:00 do të shfaqet filmi “Ferdonia”, një vepër që sjell dhimbjen dhe pritjen e familjeve që edhe pas kaq vitesh vazhdojnë të kërkojnë të dashurit e tyre.
Pas 27 vitesh, plagët ende janë të hapura. Familjet ende presin. E vërteta ende kërkohet.
Të zhdukurit nuk janë vetëm një numër.
Secili prej tyre ka një emër, një familje dhe një histori.
Prandaj, kujtimi nuk mjafton. Kërkohet e vërteta, drejtësia dhe zbardhja e fatit të secilit të zhdukur.
