ZVICËR, 8 mars 2026 – Në një ditë vendimtare për politikën fiskale zvicerane, qytetarët e Zvicrës janë deklaruar për katër iniciativa të rëndësishme federale, në një votim me pjesëmarrje të lartë prej mbi 55 për qind, transmeton 20min.ch. Rezultati më i rëndësishëm i kësaj të diele ka qenë miratimi i reformës së madhe tatimore: individualizimi i tatimit për çiftet e martuara, e cila u pranua me 54 për qind të votave pro. Me këtë vendim historik, Zvicra i jep fund sistemit të deritanishëm të deklarimit të përbashkët tatimor për bashkëshortët, duke kaluar në një model të ri ku secili person do të trajtohet individualisht në sistemin tatimor. Sipas reformës së miratuar nga Këshilli Federal, ndryshimi synon të eliminojë atë që për vite me radhë është quajtur “penalizimi i martesës” në sistemin fiskal zviceran. Në të ardhmen, secili bashkëshort do të dorëzojë deklaratë të veçantë tatimore, duke sjellë më shumë barazi dhe transparencë në sistem. Ministrja e Financave, Karin Keller-Sutter, deklaroi pas shpalljes së rezultateve se shumica e qytetarëve kanë ndjekur rekomandimet e Qeverisë dhe Parlamentit. Ajo theksoi se statusi civil nuk do të ketë më ndikim në mënyrën e tatimit, duke e quajtur këtë një reformë të rëndësishme për modernizimin e sistemit fiskal. Megjithatë, ajo sqaroi se implementimi i ligjit do të marrë kohë dhe pritet të hyjë në fuqi rreth vitit 2032, për shkak të nevojës për përshtatje nga kantonet. Sipas Qeverisë federale, reforma pritet të sjellë ulje të taksave për një pjesë të madhe të qytetarëve, veçanërisht për çiftet ku të dy bashkëshortët kanë të ardhura të ngjashme. Megjithatë, një numër i vogël familjesh mund të përballen me rritje të lehtë të barrës tatimore. Në kampin mbështetës të reformës, vendimi u përshëndet si një moment historik. Kryetarja e FDP-së, Susanne Vincenz-Stauffacher, e emocionuar deklaroi se “sot po shkruhet histori”, duke theksuar se me këtë vendim po hiqet një padrejtësi e gjatë ndaj çifteve të martuara në sistemin tatimor.
Në anën tjetër, përfaqësuesit e Partisë së Qendrës (Die Mitte), përmes presidentit Philipp Matthias Bregy, deklaruan se qytetarët kanë shprehur qartë dëshirën për heqjen e “penalizimit të martesës”, por shprehën keqardhje që nuk u votua mes dy modeleve të ndryshme për arritjen e këtij qëllimi. Ai shtoi se do të analizohen rezultatet dhe do të vendoset për hapat e mëtejshëm të iniciativës së tyre alternative.
Në të njëjtën ditë votimi, qytetarët zviceranë u prononcuan edhe për tri iniciativa të tjera:
- Iniciativa për SRG – refuzohet me 62% të votave
- Iniciativa për Klimën – refuzohet me 71% të votave
- Iniciativa për Paratë Cash – refuzohet me 54% të votave, ndërsa u miratua kundërpropozimi i Këshillit Federal me 73%
Rezultatet tregojnë një qëndrim të qartë të elektoratit zviceran në ruajtje të stabilitetit institucional, duke pranuar reformën tatimore, por duke refuzuar ndryshime më radikale në fusha të tjera. Autoritetet federale kanë theksuar se procesi i zbatimit do të jetë gradual dhe i koordinuar me kantonet, për të siguruar një tranzicion të qetë drejt sistemit të ri fiskal, transmeton 20min.ch, percjell helveticALForum.ch.
