Virusi i gripit të shpendëve, i cili aktualisht po qarkullon në mbarë botën te shpendët e egër, te pula dhe madje edhe te gjitarët, mund të shkaktojë një pandemi që mund të jetë më e rëndë se ajo e Covid-19.
Për këtë paralajmëron Marie-Anne Rameix-Welti, drejtuese mjekësore e Qendrës së Infeksioneve të Rrugëve të Frymëmarrjes në Institutin Pasteur të Parisit. Vendimtare do të ishte një mutacion që do ta lejonte virusin të transmetohej nga njeriu te njeriu. Aktualisht, njerëzit nuk kanë antitrupa kundër variantit H5 të gripit të shpendëve që po qarkullon.
Ndryshe nga Covid-19, ky virus mund të vrasë edhe njerëz të shëndetshëm dhe fëmijë, sipas ekspertëve. Edhe pse Organizata Botërore për Shëndetin e Kafshëve (WOAH) e vlerëson rrezikun e pandemisë si të ulët për momentin, specialistët kërkojnë përgatitje të mirë. Edhe Konfederata zvicerane javën e kaluar ka zgjeruar masat parandaluese në të gjithë vendin.
Frika nga përshtatja tek njerëzit
“Çfarë na shqetëson është mundësia që virusi t’i përshtatet gjitarëve – veçanërisht njeriut – dhe të transmetohet nga njeriu te njeriu, duke u shndërruar kështu në një virus pandemik”, tha Rameix-Welti për Reuters. Sipas saj, njerëzit kanë antitrupa kundër viruseve të zakonshme gripale H1 dhe H3, por jo kundër nënvariantit H5, i cili aktualisht po prek shpendët dhe gjithnjë e më shumë gjitarët. Edhe gjatë pandemisë së koronavirusit, nuk kishte imunitet të gjerë në popullatë.
Në ndryshim nga Covid-19, i cili godet më rëndë kryesisht të moshuarit dhe personat me sëmundje kronike, një virus gripi si H5 mund të vrasë edhe të rritur të shëndetshëm dhe fëmijë. “Një pandemi e gripit të shpendëve ka gjasa të jetë mjaft e rëndë, ndoshta edhe më e rëndë se pandemia që kemi kaluar”, shtoi ajo.
Vdekje e raportuar në SHBA
Vitet e fundit janë raportuar raste të infeksioneve të njerëzve me viruse H5 – përfshirë edhe variantin aktual H5N1. Këto raste zakonisht kanë ndodhur pas kontaktit të ngushtë me kafshë të infektuara.
Këtë muaj në SHBA u regjistrua një infeksion me H5N5. Personi nga shteti i Washingtonit vdiq javën e kaluar; ai kishte sëmundje paraprake.
Rreziku i pandemisë mbetet i ulët
Ekspertët ndërkombëtarë vazhdojnë ta vlerësojnë rrezikun e pandemisë si të ulët. Gregorio Torres, drejtues i departamentit shkencor në WOAH, tha:
“Duhet të jemi të përgatitur që të reagojmë me kohë. Por aktualisht njerëzit mund të shëtisin të qetë në pyll, të hanë mish pule dhe vezë dhe të shijojnë jetën. Një pandemi është e mundur, por gjasat mbeten shumë të vogla.”, transmeton 20min.ch. Nëse megjithatë ndodh një mutacion, bota është më e përgatitur se në vitin 2020. “Pika pozitive në krahasim me Covid-in është se kemi masa konkrete parandaluese. Ekzistojnë tashmë kandidatë për vaksina dhe ne dimë si t’i prodhojmë ato shpejt”, tha Rameix-Welti.
Për më tepër, ekzistojnë edhe medikamente antivirale që mund të veprojnë posaçërisht kundër virusit H5, transmeton 20min.ch dhe e përgatiti helveticALforum.ch.
(Foto ilustrim)
