Në kuadër të Ditës Ndërkombëtare kundër Diskriminimit Racor, Zvicra ka riafirmuar angazhimin e saj të palëkundur për të mbështetur individët dhe komunitetet që përballen me pabarazi për shkak të racës apo përkatësisë së tyre etnike.
Për vite me radhë, Zvicra ka qenë një partner i rëndësishëm dhe i besueshëm për Kosovën në ndërtimin e një shoqërie më gjithëpërfshirëse. Përmes programeve dhe iniciativave të ndryshme, ajo ka kontribuar në fuqizimin e komuniteteve rom, ashkali dhe egjiptian, duke i ndihmuar ata të ushtrojnë të drejtat e tyre të barabarta dhe të kenë qasje në mundësi të barabarta në shoqëri. Angazhimi i Zvicrës shtrihet në disa fusha kyçe, duke përfshirë arsimin, punësimin, përmirësimin e kushteve të banimit dhe rritjen e vetëdijes shoqërore. Këto përpjekje synojnë të krijojnë kushte më të mira jetese dhe të nxisin integrimin e plotë të këtyre komuniteteve në jetën shoqërore dhe ekonomike të vendit. Në bashkëpunim të ngushtë me Qeverinë e Kosovës, komunat, sektorin privat dhe organizatat e shoqërisë civile, Zvicra vazhdon të luajë një rol të rëndësishëm në ndërtimin e një të ardhmeje më të drejtë. Ky partneritet synon të sigurojë që të gjitha komunitetet të kenë mundësinë të kontribuojnë në zhvillimin e një Kosove prosperuese dhe paqësore. Ky mesazh i Ambasadës së Zvicrës në Kosovë vjen si një thirrje për solidaritet dhe veprim të përbashkët kundër çdo forme të diskriminimit, duke theksuar rëndësinë e barazisë, respektit dhe dinjitetit për të gjithë, transmeton Ambasada e Zvicrës në Kosovë, përcjell helveticALForum.ch.
