Në vazhdën e masave reaguese pas tragjedisë së rëndë që goditi kompleksin “Constellation”, Qeveria e Kantonit të Valais ka zyrtarizuar sot paketën e parë të ndihmës financiare.
Sipas vendimit të marrë pasditen e së mërkurës, një ndihmë emergjente prej 10,000 frangash zvicerane do t’u ofrohet menjëherë familjeve të prekura nga zjarri shkatërrues. Autoritetet saktësuan se përfitues të kësaj ndihme do të jenë familjarët e viktimave që humbën jetën, si dhe personat që mbetën të lënduar dhe u shtruan në spital si pasojë e flakëve.
Përveç ndihmës direkte shtetërore, qeveria kantonale njoftoi krijimin e një fondacioni të posaçëm e të pavarur. Ky entitet do të ketë për detyrë menaxhimin e donacioneve të shumta që priten nga solidariteti qytetar, të cilat do të grumbullohen në një llogari bankare të dedikuar.
Në njoftimin zyrtar, Qeveria e Valais ka bërë një ndarje të qartë të përdorimit të parave, për të shmangur çdo keqkuptim.
“Këto fonde nuk do të përdoren në asnjë rrethanë për të mbuluar kostot që vijnë nga zjarri, të cilat do të mbulohen plotësisht nga Shteti i Valais,” thuhet në deklaratë.
Kjo garanton se çdo qindarkë e dhuruar nga publiku apo e akorduar si ndihmë emergjente, do të shkojë drejtpërdrejt në mbështetje të familjeve të dëmtuara dhe jo për shpenzime operative apo logjistike të shtetit, transmeton rtsh.
