Përgatiti Dashnim HEBIBI
Në Bibliotekën e Qytetit “Hivzi Sulejmani” në Prishtinë do të zhvillohet promovimi i dy librave poetikë të autores Zize Pepshi, një veprimtare e njohur e çështjes kombëtare dhe e përkushtuar prej vitesh ndaj ruajtjes dhe kultivimit të gjuhës e kulturës shqiptare. Në këtë veprimtari do të prezantohen dy përmbledhjet poetike “Më janë përzier atdhetë” dhe “Edhe vdekja, turbërohet nga dashuria”, vepra që sjellin përpara lexuesit ndjeshmërinë poetike të autores, por edhe temat që kanë shoqëruar vazhdimisht angazhimin e saj intelektual e shoqëror. Zize Pepshi është e njohur jo vetëm në mesin e shqiptarëve në diasporë për kontributin e saj kombëtar.
Për shumë vite ajo ka dhënë kontribut edhe si ish-mësuese e Shkollës Plotësuese Shqipe, pstaj bëmirëse, duke u angazhuar në edukimin e brezave të rinj dhe në ruajtjen e lidhjes së tyre me gjuhën, kulturën dhe identitetin shqiptar. Shkrimet dhe veprimtaria e saj janë karakterizuar vazhdimisht nga mesazhi i bashkimit kombëtar, dashuria për atdheun dhe ruajtja e vlerave shqiptare. Përmes poezisë dhe veprimtarisë së saj publike, Pepshi ka përcjellë mesazhe të forta për unitetin, solidaritetin dhe përgjegjësinë ndaj identitetit kombëtar. Ajo përfaqëson gjithashtu shembullin e një gruaje të angazhuar, të arsimuar dhe aktive në jetën shoqërore e kombëtare, duke dëshmuar se kontributi i gruas shqiptare në diasporë shkon përtej familjes dhe profesionit, duke u shtrirë edhe në ruajtjen e vlerave kombëtare dhe në jetën kulturore.
Kontributi i saj ndër vite ka bërë që Zize Pepshi të gëzojë respekt dhe autoritet të konsiderueshëm edhe në institucionet zvicerane, ku veprimtaria e saj është lidhur me përfaqësimin dinjitoz të komunitetit shqiptar dhe me angazhimin qytetar e kulturor. Jeton dhe vepron në Zvicër. Promovimi i dy veprave të saj në Prishtinë pritet të jetë një takim mes artit, letërsisë dhe dashurisë për atdheun, duke sjellë në vëmendje një autore që krijimtarinë e saj poetike e ka lidhur ngushtë me përvojën njerëzore, kujtesën, dashurinë dhe idealin e bashkimit. Në këtë promovim do të jenë të pranishëm edhe botuesi i dy veprave, poeti i madh Nazmi Rrahmani, si dhe redaktori dhe publicisti i mirënjohur Shefqet Dibrani. Në këtë ngjarje pritet të marrin pjesë gjithashtu shumë poetë, shkrimtarë, krijues dhe dashamirës të letërsisë e të kulturës shqiptare.
Promovimi mbahet më 23 shtator 2026, në orën 15:00, në Bibliotekën e Qytetit “Hivzi Sulejmani”, rr. Sadik Bektëshi, Lagjja Dardania, Prishtinë.
Të gjithë dashamirët e letërsisë, poezisë dhe kulturës shqiptare janë të ftuar të marrin pjesë.
