Së fundmi, në internet po qarkullojnë lajme se aplikacioni i njohur i mesazheve WhatsApp mund të bëhet me pagesë, me një kosto rreth 4 euro në muaj për përdorim pa reklama. Këto pretendime kanë ngritur shqetësime te shumë përdorues, të cilët flasin madje për “ndryshime drastike” dhe fundin e WhatsApp-it falas. Megjithatë, realiteti është më pak dramatik, transmeton 20min.ch. Portali austriak i verifikimit të fakteve Mimikama.at ka analizuar këto thashetheme, të cilat bazohen në pamje të publikuara nga portali i njohur i rrjedhjeve WABetaInfo. Pamjet tregojnë një version testues të brendshëm të WhatsApp për Android, ku shihet një ndërfaqe që sugjeron një abonim opsional për përdorim pa reklama.
Bisedat, grupet dhe thirrjet mbeten falas
Sipas informacioneve aktuale, modeli i ri me pagesë nuk do të prekë bisedat private, grupet apo thirrjet. Këto do të vazhdojnë të jenë falas dhe pa reklama. Abonimi i mundshëm do të zbatohej vetëm për skedën e përditësimeve (Status dhe Channels), ku planifikohet shfaqja e reklamave për përdoruesit pa abonim.
Kjo do të thotë se pagesa do të jetë plotësisht vullnetare, dhe kush nuk dëshiron të paguajë, mund të vazhdojë të përdorë WhatsApp-in për komunikim të përditshëm pa asnjë ndryshim.
Çmimi ende i paqartë dhe provizor
Në versionin beta të Android-it (2.26.3.9) shfaqet një çmim rreth 4 euro në muaj, por sipas Mimikama.at, ky është vetëm një çmim provizor (placeholder). Deri në prezantimin zyrtar, shuma mund të ndryshojë dhe pritet të varet nga vendi dhe cilësimet e llogarisë së përdoruesit. Ende nuk është e qartë nëse dhe si kjo risi do të zbatohet në Zvicër. Sfondi i këtij zhvillimi lidhet me rregulloret e Bashkimit Evropian, të cilat u kërkojnë platformave të mëdha t’u ofrojnë përdoruesve një zgjedhje: ose reklama të personalizuara, ose një model me pagesë pa reklama. Modele të ngjashme tashmë ekzistojnë në platforma si Facebook dhe Instagram.
Në përfundim, WhatsApp nuk po bëhet me pagesë në tërësi. Bëhet fjalë për një opsion shtesë, jo për fundin e aplikacionit falas që njohim sot, transmeton20min.ch, përcjell helveticALforum.ch
