Siç mëson helveticAlforum.ch, Shefi i Misionit Konsullor të Konsullata e Republikës së Kosovës në Cyrih, z. Vigan Berisha, ka shprehur mirënjohjen e tij përmes një mesazhi publik në rrjetet sociale, me rastin e organizimit të shënimit të 18-vjetorit të Pavarësisë së Republika e Kosovës në Cyrih. Më poshtë gjeni versionin e redaktuar dhe të zgjeruar të falënderimit të tij:
FALËNDERIM
Me rastin e organizimit të shënimit të 18-vjetorit të Pavarësisë së Republikës së Kosovës në Cyrih, kam nderin dhe kënaqësinë të shpreh mirënjohjen time më të thellë dhe më të sinqertë për të gjithë ata që kontribuuan, mbështetën dhe morën pjesë në këtë mbrëmje solemne, dinjitoze dhe përplot emocion.
Ishte privilegj i veçantë të mirëpresim mbi 400 të ftuar, përfaqësues diplomatikë dhe konsullorë nga vende të ndryshme, autoritete të nderuara zvicerane, përfaqësues institucionesh qendrore e lokale, komunitete fetare, shoqata kulturore e humanitare, përfaqësues të mediave, si dhe mërgatën tonë të jashtëzakonshme, e cila me përkushtimin dhe sukseset e saj vazhdon të jetë urë e fuqishme lidhëse ndërmjet Kosovës dhe Zvicrës.
Prania juaj e bëri këtë përvjetor edhe më domethënës, duke i dhënë peshën dhe vlerën që meriton një datë kaq e rëndësishme në historinë e shtetit tonë. Atmosfera e krijuar dëshmoi edhe njëherë se uniteti, bashkëpunimi dhe përkushtimi i përbashkët janë themeli mbi të cilin ndërtojmë dhe forcojmë marrëdhëniet tona ndërinstitucionale, ekonomike, kulturore dhe shoqërore.
Mirënjohje e veçantë shkon për kolegët e mi në Konsullatën e Republikës së Kosovës në Cyrih për angazhimin e palodhshëm dhe profesionalizmin e treguar në çdo detaj të organizimit. Një falënderim i përzemërt i dedikohet edhe Ambasadorit të Republikës së Kosovës në Zvicër, Sh.T.Z. Mentor Latifi, si dhe kolegëve diplomatë nga Berni dhe Gjeneva, për bashkëpunimin dhe mbështetjen e vazhdueshme.
Gjithashtu, shpreh falënderim të veçantë për bizneset, ansamblet artistike, partnerët dhe sponsorët që kontribuuan në realizimin e këtij aktiviteti, si dhe për fotografët dhe mediat që siguruan një mbulim profesional dhe dinjitoz të kësaj ngjarjeje të rëndësishme.
Ju falënderoj sinqerisht për pjesëmarrjen, mbështetjen dhe besimin tuaj të vazhdueshëm. Së bashku do të vazhdojmë të punojmë me përkushtim për forcimin e imazhit të Republikës së Kosovës dhe për thellimin e bashkëpunimit ndërmjet dy vendeve tona mike, transmeton helveticALforum.ch.
Me respekt të thellë,
Vigan Berisha
