Vaksinat vektoriale gjatë pandemisë së koronës, në raste shumë të rralla, kanë shkaktuar mpiksje gjaku në tru. Një ekip studiuesish ka zbuluar arsyen pse ndodhi kjo.
Në pranverën e vitit 2021 u bënë të njohura rastet e para të trombozave cerebrale pas vaksinimit kundër Covid-it. Këto raste ndodhën pas vaksinave të AstraZeneca dhe Johnson & Johnson, të cilat janë të ashtuquajturat vaksina vektoriale. Vaksinat mRNA nga Moderna dhe Pfizer nuk u prekën nga ky problem, transmeton 20min.ch. Tani një ekip kërkimor ka zbuluar se si mund të kenë ndodhur këto tromboza dhe pse ato u shfaqën vetëm në raste të rralla, raporton gazeta zvicerane Tages-Anzeiger. Në Gjermani, nga 9,2 milionë vaksinime me vaksinat e përmendura, u regjistruan 106 raste me tromboza cerebrale. 21 persona humbën jetën. Në Zvicër, vaksina e AstraZeneca-s nuk ishte e miratuar, ndërsa ajo e Johnson & Johnson u përdor shumë rrallë.
Rreziku vinte nga “mjeti transportues”
Një vaksinë vektoriale funksionon, e thjeshtuar, në këtë mënyrë: ajo përmban planin (kodin gjenetik) për një pjesë të virusit. Në rastin e vaksinës kundër Covid-19, ishte plani për proteinën “Spike” të virusit. Kur ky plan hyn në bërthamat e qelizave tona, ato prodhojnë proteinën përkatëse, duke i mundësuar sistemit imunitar ta njohë virusin dhe të krijojë antitrupa.
Një pjesë e adenovirusit (që përdoret si mjet transportues në këto vaksina) i ngjan një pjese të faktorit trombocitar 4 (Platelet Factor 4) tek njeriu. Ky proteinë luan rol të rëndësishëm në mpiksjen e gjakut. Në rast të një mutacioni të rastësishëm, antitrupat e krijuar mund të sulmonin gabimisht këtë faktor trombocitar. Si pasojë, mund të formoheshin mpiksje gjaku (tromboza) në tru.
“Ky kombinim i një mutacioni të rastësishëm dhe një veçorie gjenetike ndodh jashtëzakonisht rrallë. Prandaj edhe rreziku për këtë komplikim është shumë i ulët”, thotë bashkautorja e studimit, Linda Schönborn nga Universiteti i Mjekësisë në Greifswald.
“Tani mund t’i bëjmë vaksinat vektoriale më të sigurta për të gjithë”, shton bashkautori Andreas Greinacher, transmeton 20min.ch, përcjell helveticALforum.ch
(Foto ilustrim)
