Me rastin e 12-vjetorit të themelimit të Ansamblit “TROJET” në Winterthur, një urim i veçantë ka ardhur nga Dr. Salih Sefa, ish-Konsulli i Republikës së Kosovës në Cyrih dhe anëtar nderi i këtij ansambli, i cili ka ndjekur nga afër rrugëtimin e këtij institucioni të rëndësishëm kulturor të mërgatës shqiptare në Zvicër.
Në mesazhin e tij, ai shpreh mirënjohje dhe vlerësim të lartë për punën e palodhshme të anëtarëve të të gjitha grupmoshave të Ansamblit TROJET, duke përfshirë kryesinë dhe kryetarin, z. Zeqir Gashi.
“Ansambli TROJET, që nga dita e themelimit e deri më sot, i ka dhënë jetë mërgatës sonë. Për 12 vjet me radhë ka kultivuar, zhvilluar dhe promovuar me përkushtim të jashtëzakonshëm traditat e kulturës kombëtare shqiptare,” shprehet Dr. Sefa.
Ai thekson se në thelb të veprimtarisë së Ansamblit TROJET qëndrojnë:
- Respektimi i vlerave kombëtare të Shqipërisë Etnike;
- Ruajtja dhe kultivimi i traditave tona popullore;
- Promovimi i kulturës tradicionale shqiptare jo vetëm në mesin e mërgatës, por edhe para qytetarëve zviceranë dhe të vendeve të tjera;
- Angazhimi i të gjitha grupmoshave në këndim dhe vallëzim;
- Përfshirja e gjeneratës së tretë, me qëllim që të lidhen më afër me rrënjët, kulturën dhe atdheun.
