Në një atmosferë të jashtëzakonshme sportive dhe festive, Xhamia e Bardhë Aarburg organizoi me krenari turnirin tradicional kushtuar 28 Nëntorit – Ditës së Pavarësisë.
Ky aktivitet mblodhi bashkë dhjetëra ekipe, sportistë dhe dashamirës të futbollit nga e gjithë Zvicra, duke e kthyer ditën në një festë të miqësisë dhe krenarisë kombëtare.
One Touch triumfoi duke zënë vendin e parë, Xhamia e Bardhë Aarburg u rendit e dyta, ndërsa Xhamia Drita Luzern fitoi vendin e tretë.
Çmimet e veçanta: Avni Halimi u vlerësua si Lojtari i Turnirit, ndërsa Xhamia Drita Luzern mori çmimin e sportivitetit – Fair Play.
Një ditë më parë, fëmijët e moshave 7–14 vjeç treguan talentin e tyre në një mini-turnir të veçantë, duke na dhuruar emocione dhe duke na bërë krenarë për gjeneratën e re.
160 futbollistë dhe 40 nxënës demonstruan aftësitë dhe talentin e tyre, duke dhuruar spektakël sportiv për të pranishmit.
Gjatë gjithë kohës,pjesëmarrësit dhe vizitorët u shërbyen me ushqime e pije të ndryshme, ndërsa sallën e gjallëruan këngët me karakter kombëtar, të cilat e bënë edhe më madhështor këtë aktivitet kushtuar 28 Nëntorit.
Mirënjohje e veçantë për sponsorët, ekipet pjesëmarrëse, referët, aktivistët, stafin organizativ dhe mysafirët e nderit – kryesia e Xhamisë Drita Luzern – që e bënë këtë ditë të paharrueshme të mundur.
Imami i Xhamisë së Bardhë, mr. Nehat Ismaili, dhe kryetari Nimet Ramadani shprehën mirënjohjen e tyre për të gjithë pjesëmarrësit, duke vlerësuar lojën e ndershme dhe shpirtin e fair play që mbizotëroi gjatë turnirit.
Ky turnir, i organizuar pa ndërprerje që nga 2011, është më shumë se një garë sportive: është një traditë e bashkimit, e krenarisë kombëtare dhe e miqësisë. Energjia, pasioni dhe solidariteti i treguar na motivojnë të vazhdojmë këtë traditë edhe në vitet e ardhshme.
Sektori për informim
Xhamia e Bardhë Aarburg
