Presidenti i SHBA-së, Donald Trump, ka sulmuar ashpër presidentin izraelit, Isaac Herzog, duke e cilësuar atë “të dobët dhe patetik” dhe duke e akuzuar për mashtrim lidhur me një premtim për faljen e kryeministrit Benjamin Netanyahu.
Në një intervistë, Trump deklaroi se Herzog i kishte thënë disa herë se do ta falte Netanyahun, por sipas tij, kjo nuk ndodhi. Ai shtoi se presidenti izraelit “nuk ishte një udhëheqës”.
Trump kritikoi gjithashtu procesin gjyqësor ndaj Netanyahut, duke e cilësuar atë si një shpërqendrim nga çështjet e luftës. “Bibi duhet të përqendrohet te lufta, jo te budallallëqet”, u shpreh ai.
Kjo nuk është hera e parë që Trump ngre këtë çështje, pasi më herët e ka quajtur Herzogun “të dobët dhe të padobishëm” dhe e ka akuzuar për përdorim politik të çështjes së faljes.
Nga ana tjetër, një zyrtar i lartë izraelit ka kundërshtuar pretendimet e Trump, duke theksuar se Herzog nuk ka bërë kurrë një premtim të tillë dhe se çdo kërkesë do të trajtohej sipas procedurave ligjore. Ndërkohë, Netanyahu vijon të përballet me akuza për korrupsion, të lidhura me favore dhe përfitime të dyshuara në këmbim të vendimeve politike dhe mbështetjes për figura të fuqishme të biznesit dhe medias, transmeton euronewsal.
