Ministri për Evropën dhe Punët e Jashtme, Ferit Hoxha, ka pritur të dielën në një takim zyrtar anëtarin e Bundestagut gjerman, Peter Beyer. Sipas njoftimit zyrtar, në qendër të bisedimeve dypalëshe ishte ecuria e procesit të anëtarësimit të Shqipërisë në Bashkimin Evropian dhe vazhdimësia e reformave kyçe.
Gjatë takimit të zhvilluar në mjediset e Ministrisë për Evropën dhe Punët e Jashtme (MEPJ), zyrtarët analizuan progresin e arritur nga Shqipëria në rrugëtimin e saj integrues. Në një deklaratë të publikuar pas takimit në rrjetin social X, ministri Hoxha konfirmoi angazhimin e përbashkët për të çuar përpara agjendën e zgjerimit të BE-së.
Kryediplomati shqiptar theksoi rëndësinë e bashkëpunimit me partnerët ndërkombëtarë dhe vlerësoi rolin proaktiv të parlamentit gjerman në mbështetje të Tiranës zyrtare.
“Shpreha mirënjohjen time të sinqertë për mbështetjen e fortë dhe të vazhdueshme të Gjermanisë dhe Bundestagut gjerman ndaj rrugëtimit evropian të Shqipërisë,” citohet Hoxha në njoftimin e tij.
Sipas MEPJ, ky takim shërbeu për të thelluar më tej dialogun politik mes dy vendeve, në funksion të forcimit të bashkëpunimit dypalësh dhe garantimit të mbështetjes së Berlinit për hapat e radhës të Shqipërisë drejt strukturave evropiane, transmeton rtsh.
