Përgatiti Dashnim HEBIBI, Zürich
Siç ka mësuar helveticALforum.ch, Ambasadori i Republikës së Kosovës në Japoni, prof. dr. Sabri Kiçmari, ka zhvilluar një takim shumë të rëndësishëm diplomatik me znj. Yuriko Koike, guvernatoren e Tokios – metropolit më të madh dhe një nga qytetet më dinamike në botë.
Takimi u realizua me rastin e pritjes solemne që guvernatorja Koike organizoi për korin diplomatik, ku Ambasadori Kiçmari pati një bisedë të ngrohtë, miqësore dhe përmbajtësore me të. Znj. Koike njihet si një mike e dëshmuar e Kosovës, e cila ka treguar vazhdimisht mirëkuptim dhe respekt për vendin tonë dhe popullin e tij.
Tokio, si qendër globale politike, ekonomike dhe kulturore, përfaqëson një model unik urban: energji të pandalshme, pastërti shembullore, rregull të admirueshëm dhe një qetësi mbresëlënëse, pavarësisht ritmit të shpejtë të jetës. Në këtë mjedis sfidues dhe prestigjioz, përfaqësimi diplomatik i Kosovës merr një rëndësi të veçantë.
Prof. dr. Sabri Kiçmari, i njohur për përgatitjen e tij të lartë akademike, përvojën politike dhe qasjen e matur diplomatike, po e përfaqëson Kosovën me dinjitet dhe profesionalizëm në Japoni. Aktiviteti i tij diplomatik po kontribuon në forcimin e marrëdhënieve bilaterale, në rritjen e imazhit ndërkombëtar të Kosovës dhe në hapjen e mundësive të reja të bashkëpunimit me një nga vendet më të fuqishme dhe më të respektuara në botë.
Ky takim konfirmon edhe një herë se diplomacia kosovare, përmes përfaqësuesve të saj të denjë, po arrin të ndërtojë ura miqësie dhe bashkëpunimi në skenën ndërkombëtare.
helveticALforum.ch
