Përgatiti D.H
Siç mëson helveticALforum.ch, Prof. Dr. Vehbi Miftari, Shef i Misionit të Republikës së Kosovës pranë Selisë së Shenjtë, ka zhvilluar një takim të rëndësishëm diplomatik me ambasadoren e Portugalisë në Selinë e Shenjtë, Maria Amélia Maio de Paiva.
Në qendër të këtij takimi ishte thellimi i bashkëpunimit ndërshtetëror ndërmjet Kosovës dhe Portugalisë, si dhe koordinimi i aktiviteteve të përbashkëta diplomatike pranë Selisë së Shenjtë. Diskutimet përfshinë gjithashtu shkëmbimet kulturore dhe ekonomike, si dimensione të rëndësishme të marrëdhënieve dypalëshe.
Duke folur për këtë takim, Prof. Dr. Vehbi Miftari theksoi mbështetjen e vazhdueshme dhe të pakursyer të Portugalisë ndaj Kosovës, duke e cilësuar atë si një nga përkrahëset e hershme të shtetësisë së Kosovës dhe të synimeve të saj për integrim euroatlantik.
“Portugalia, mbështetëse e hershme e Kosovës dhe përkrahëse e synimeve të saj për integrim euroatlantik, është po kështu përkrahëse e pakursyer në rrugëtimin e Kosovës në Selinë e Shenjtë. Ishte kënaqësi të diskutoja me ambasadoren Maria Amélia Maio de Paiva mbi bashkëpunimin ndërshtetëror, shkëmbimet kulturore e ekonomike dhe thellimin e bashkërendimin e aktiviteteve të misioneve tona në Selinë e Shenjtë”, u shpreh Miftari.
Ky takim vlerësohet si një hap i rëndësishëm në forcimin e pranisë diplomatike të Kosovës dhe në konsolidimin e marrëdhënieve me shtetet mike, në një nga qendrat më të rëndësishme morale dhe diplomatike në botë, transmeton helveticALforum.ch
