/Nga: Dashnim HEBIBI, Zürich/
Sot në Konsullatën e Republikës së Kosovës në Cyrih, futbollisti i ri dhe i talentuar David Duzhmani bëri një hap të rëndësishëm në rrugëtimin e tij sportiv, duke aplikuar për t’u pajisur me pasaportën e Republikës së Kosovës.
Ky aplikim vjen si pjesë e përgatitjeve për përfaqësimin e tij në ngjyrat e Kombëtares U16 të Kosovës, me ftesë nga Federata e Futbollit të Kosovës, për pjesëmarrje në turneun ndërkombëtar “UEFA U16 Youth Development Tournament” që do të mbahet në Shqipëri nga 19 deri më 25 prill 2025.
Në këtë moment domethënës, David u prit nga Shefi i Misionit Konsullor në Cyrih, z. Vigan Berisha, i cili e përgëzoi për suksesin dhe vendosmërinë e tij për të përfaqësuar me krenari shtetin e Kosovës në arenën ndërkombëtare të futbollit. Z. Berisha, me modesti dhe përkushtim të veçantë, vlerësoi vendimin e familjes Duzhmani për t’u lidhur zyrtarisht me Kosovën dhe për të dhënë kontribut në sportin tonë kombëtar.
Ky takim ishte një dëshmi e qartë e përkushtimit të institucioneve të Kosovës për të mbështetur të rinjtë e mërgatës dhe për t’i afruar ata me vendin e origjinës. Shefi i misionit, z. Berisha, i cili tashmë prej një viti mban këtë detyrë në Cyrih, ka arritur të krijojë lidhje të forta me komunitetin shqiptar në Zvicër, duke u bërë një figurë e respektuar dhe e dashur për shkak të qasjes së tij të thjeshtë, njerëzore dhe profesionale.
Përkushtimi i tij për të shërbyer mërgatës me ndershmëri, përgjegjësi dhe pa bujë, është një model i diplomacisë sonë që afron, dëgjon dhe mbështet. Falë këtij angazhimi, Konsullata në Cyrih po bëhet gjithnjë e më shumë një adresë e besueshme për qytetarët tanë jashtë vendit.
Jemi krenarë për të rinjtë si David Duzhmani, të cilët me talent, pasion dhe përkushtim zgjedhin ta përfaqësojnë Kosovën. Po aq krenarë jemi për diplomatë si z. Vigan Berisha, që me përkushtim e profesionalizëm ndërtojnë ura të forta mes diasporës dhe shtetit të Kosovës.
SAM24.info