Vaxhid Xhelili, poeti që sfidon moshën me pedale udhëtimesh

/ Nga: Dashnim Hebibi / Deri në momentin e fundit, Vaxhid Xhelili ka pasur dilema mes dy destinacioneve: Kopenhaga në Danimarkë apo Barcelona në Spanjë. Të dyja qytetet e tërhiqnin për arsye të ndryshme – Kopenhaga me rrjetin e saj perfekt të biçikletave dhe qetësinë karakteristike skandinave, ndërsa Barcelona me diellin, detin dhe atmosferën e gjallë mesdhetare.

Në fund, ishte moti ai që e vendosi balancën. Sipas parashikimeve për javën që vjen, nga data 12 maj 2025, në Barcelonë pritet mot i ngrohtë dhe me diell, me temperatura që do të shkojnë nga 23 deri në 27°C. Ndërkohë, Kopenhaga do të mbetet më e freskët, me temperatura që do të luhaten nga 13 deri në 17°C. Kështu, zgjedhja ra mbi Barcelonën. Vaxhid Xhelili, poet dhe shkrimtar i njohur që jeton e vepron në Zvicër, njihet gjithashtu për pasionin e tij të veçantë për biçikletat. Udhëtimet me dy rrota janë kthyer në një mënyrë jetese për të. Ai ka përshkuar me biçikletë distanca të gjata, nga Zvicra deri në Preshevë e Kosovë, dhe shpesh herë shkon edhe më larg, duke sfiduar veten dhe kohën.

Udhëtimet e tij të vazhdueshme në Shqipëri, Kosovë, Luginë të Preshevës, Maqedoni të Veriut dhe nëpër vende të ndryshme të Europës, janë bërë një formë e pashtershme energjie dhe motivimi. Për Vaxhi Xhelilin, biçikleta nuk është vetëm një mjet udhëtimi, por edhe një mënyrë për të qëndruar i lidhur me natyrën, njerëzit dhe jetën aktive. Në përditshmërinë e tij, ai nuk e ndan veten nga biçikleta, duke sjellë vazhdimisht foto dhe kujtime të bukura nga rrugëtimet e tij. Këto udhëtime janë dëshmi e një fryme të gjallë dhe një qëndrimi pozitiv ndaj jetës, ku mosha është vetëm një numër.