Sot, në ambientet e Universitetit “Haxhi Zeka” në Pejë, u zhvillua një takim zyrtar me përfaqësues nga Universiteti “Aleksandër Moisiu” i Durrësit, të kryesuar nga Dekani i Fakultetit të Biznesit, Prof. Asoc. Dr. Llambi Prendi dhe Prof. Asoc. Dr. Ermira Qosja, si dhe me përfaqësues nga Instituti Kanadez i Teknologjisë, të kryesuar nga Administratori, z. Bledar Komini.
Delegacioni u prit nga Rektori i UHZ-së, Prof. Dr. Armand Krasniqi, së bashku me bashkëpunëtorë të tij akademikë dhe administrativë. Gjatë takimit u diskutuan mënyrat e forcimit të bashkëpunimit ndërinstitucional, duke u mbështetur mbi marrëveshjet e mëparshme të nënshkruara mes institucioneve.
Në fokus të diskutimeve ishte angazhimi i përbashkët në hartimin dhe zbatimin e projekteve shkencore dhe akademike, me synim aplikimin në fondet e Bashkimit Evropian. Palët u shprehën të gatshme të intensifikojnë bashkëpunimin në fushën e shkëmbimeve akademike, përfshirë mobilitetin e stafit dhe studentëve, si dhe zhvillimin e aktiviteteve të përbashkëta kërkimore.
Ky takim përbën një moment të veçantë për Universitetin “Haxhi Zeka”, pasi hap dyer të reja bashkëpunimi dhe krijon ura lidhëse me institucione të tjera të arsimit të lartë. Përmes partneriteteve të tilla, UHZ synon të ofrojë më shumë mundësi për studentët dhe stafin e tij – qoftë në shkëmbime akademike, projekte kërkimore apo aktivitete të përbashkëta – duke ndihmuar kështu që universiteti të rritet e të zhvillohet si një hapësirë e gjallë e dijes, inovacionit dhe bashkëpunimit ndërkombëtar./UNHZ